El PP diz que quier desaniciar l’Axencia de Cooperación

La diputada del PP na Xunta Xeneral del Principáu Inmaculada González declaró ayeri que si'l so partíu gana les próximes elecciones autonómiques cuenta con pesllar l'Axencia Asturiana de Cooperación al Desarrollu". La diputada del PP centró la so crítica al organismu que dirixe Rafael Palacios y la xustificación pal so pieslle nel fechu de que'l so presupuestu pa viaxes lu llevare a dar trés vegaes la vuelta al mundu en dos años y mediu "pa supervisar proyectos".

Inmaculada González afirmó esto nuna rueda de prensa pa presentar les alegaciones del PP sobre l'anteproyectu de Llei de Cooperación qu'empobina l'Axencia y que definió como "incomprensible" y como una mecigaya de lleis d'otres comunidaes. El PP presentó en total 19 enmiendes a esti anteproyectu de les que s'aceptaron 6, referentes a l'inxerimientu na llei del conceptu de "vulnerabilidá sanitaria" o l'aceptación de proyectos empobinaos por ONGs de rexistru estatal anque nun lu tengan autonómicu y la redefinición del conceptu de 0,7% qu'invierte Asturies en Cooperación pa que pase a ser el 0,7% del PIB asturianu y non el mesmu porcentaxe pero de los recursos propios de l'autonomía.