El PP califica de "propaganda hortera" l'unvíu d'un DVD a emigrantes qu'inclúi un discursu d'Areces

El diputáu del PP na Xunta Xeneral del Principáu (XXPA) Fernando Goñi calificó güei una "propaganda hortera" l'unvíu "masivu" a emigrantes asturianos d'un DVD pa felicitar les Navidaes qu'inclúi un discursu del presidente del Principáu, Vicente Álvarez Areces. A xuiciu de Goñi, la iniciativa incumple la Llei de Publicidá Institucional y respuende a la "obsesión d'Areces" pol "autobombu". El diputáu del PP acusó amás al Gobiernu asturianu de "marafundiar recursos públicos", peritando'l coste del DVD, unviáu a unos 70.00 emigrantes en "más de 600.000 euros".

Nuna rueda prensa na Xunta Xeneral del Principáu, dixo que'l discursu d'Areces, col qu'entama'l DVD, resulta "hortera, pasáu de moda y ridículu". Añadió que'l PP nun critica que se felicite la Navidá a los asturianos que viven nel esteriorer, pero señaló que la forma de facelo resulta "vergoñosa". "Con una tarxeta bastaba", señaló, insistiendo en que la inciativa ye una cmapaña preparada "por y pal presidente", y que la so financiación tenía de pagala'l PSOE. Baxo estes premises, el PP solicitó na Xunta Xeneral del Principáu della informació sobre la edición y distribución del DVD. Na solicitú pídese'l coste total de la edición, asina como les empreses encargaes de realizalu y l'aportación realizada pol Principáu. El PP tamién entruga polos contratos formalizaos coles empreses que ficieron el DVD, asina como l'importe de les axudicaciones.

Según esplicó Goñi, nun ye la primer vez que'l Gobiernu asturianu usa práctiques d'esti tipu. Nesti sen, recordó que l'añu pasáu por estes feches el PP ya criticó l'unvíu a emigrantes d'un CD de felicitación navidiega, nel qu'existía una "pista oculta" con otru dicursu "cursi" d'Areces. Esplicó que'l gobiernu, como n'otres ocasiones en materia de publicidá, negóse a dar naquella ocasión cualquier tipu d'información al respecto. Tamién recordó'l repartu, nel branu del 2006, del llibru 'Construyendo Asturies', qu'afalagaba delles obres públiques nel Principáu. Reprochó amás al Executivu que nun remitiera a la Cámara'l preceptivu informe sobre les distintes campañes publicitaries, y tal y como s'estipula na Llei de Publicidá Institucional.