L.lena celebra les fiestes de La Flor

Esti fin de selmana, la Pola L.lena celebra les tradicionales fiestes de La Flor. Amás de les verbenes con orquesta que van celebrase na plaza d'Alfonso X, el programa incluye la representación teatral n'asturianu de la obra "puntu y coma" a cargu de la compañía "Higiénico Papel" (sábadu 22 nel Teatru Vital Aza 20:00h).

Paralelamente, va celebrase tamién la III edición del Mercáu Tradicional La Flor de L.lena, un eventu entamáu pola Xunta Cultural Rebelgu. Nel mercáu, que va asitiar les sos actividaes nel barriu vieyu La Caleya de La Pola, ta previsto que participen cerca d'un cientu d'artesanos. Les actividaes previstes pa esti mercáu van entamar el sábadu col pregón a les once la mañana y cola animación de cai a cargu de "Pelagatos Trup" cola la obra titulada "La Quiniela" y el pasucais de la "Banda de Gaites Güestia" y el grupu de baille "Xanzaina". La nueche del sábadu van actuar los grupos "Skontra" que va salir al escenariu del mercáu a les 9 y media de la nueche y "La Col.lá Propinde" que va facelo a les diez y media. Pa la xornada del domingu'l bandurrieru Hector Braga va entretener la tarde pa finar les actividaes col conciertu de Dixebra, que tien hora pa les diez y media de la nueche.