Rice y Solana estudien la posibilidá d'unviar una misión conxunta de los EEUU y la UE a Kenia

"L'Altu Representante pa la Política Esterior y de Seguridá común de la Unión Europea, Javier Solana, y la secretaria d'Estáu Norteamericana, Condoleezza Rice, trataron ayeri nuna conversación telefónica la ""posibilidá"" d'unviar ""una misión conxunta d'Estaos Uníos y la Unión Europea"" a Kenia pa ""dialogar coles partes sobre'l terrenu y apoyar el diálogu ente les mesmes"" tres les contestaes elecciones presidenciales naquel país africanu, según confirmaron fontes de la oficina de Solana.

Diches fontes señalaron que tala posibilidá ""foi una idea que'l diplomáticu español treslladó a Rice"", anque nada falaron sobre la composición o númberu de la misión conxunta. De la mesma manera precisaron les fontes, trátase de ""una opción ente munches otres que trataron per teléfono"", ensin precisar el conteníu del restu d'alternatives baraxaes. Per otra parte, Solana y Rice ""alcordaron animar conxuntamente a les partes en conflictu a entamar un diálogu col oxetivu d'estabilizar la situación y la formación d'un Gobiernu d'unidá o de coalición"", señalaron les fontes. ""La prioridá debe centrase nestos esfuercios"", añadieron. A xuiciu de Solana, ""tou esfuerciu"" pa estabilizar el país africanu ""va ser bienveníu"", motivu pol cual Solana ""apoya la mediación de la Unión Africana"" en Kenia, y espera que ""el Gobiernu d'ellí l'acepte"", esplicaron fontes de la so oficina. Solana y Rice, que conversaron per teléfonu sobre les 13.15 hores, ""permanecen en contactu frecuente"" polos enfrentamientos surdíos en Kenia tres la investidura del presidente, Mwai Kibaki, el pasáu domingu, a pesar de que nun priniciu el recuentu parcial inicial diera la victoria al candidatu del Movimientu Democráticu Naranxa, Raila Odinga. ""Solana ta mui esmolecíu, igual que Rice"" pola situación en Kenia, onde nos últimos seis díes d'enfrentamientos ente partidarios d'ún y otru cobráronse la vida de más de 300 persones, según grupos de Derechos Humanos locales y internacionales. ""Dambos siguen mui de cerca los acontecimientos"" nel país africanu, señalaron les fontes citaes pola axencia Europa Press."