Gaspar Meana reinterpreta la Ilesia ramirense de Santa María

Dende los dos númberos que llegaron estos díes a les llibreríes de "La Crónica de Leodegundo" la saga en cómic que cunta la hestoria de la monarquía asturiana, l'autor, Gaspar Meana, fai una tésis que desafía a los historiadores al proponer que la Ilesia de Santa María del Naranco se construyere como un gran palaciu de xusticia nel que'l monarca, al xeitu d'un emperador romanu y d'otros reis medievales, aplicaría la llei dende un tronu divinu que sedría representación del xuiciu final.

Gaspar Meana adelantó na presentación de los númberos XXIII y XXIV de la "Crónica de Leodegundo" dellos puntos de la so teoría, que cuenta con llevar a un llibru, pola cual la ilesia de Santa María del Naranco sedría dalgo más que l'aula palatina del que falen los más de los llibros ensin entrar en más fondures. Meana diz que tien identificaos simbolismos dientro de la gran nave que concueyen cola simboloxía del apocalipsis , na que Cristo tomaría'l centru de la representación. Al autor abúlta-y que l'edificiu del Naranco sedría una contraposición del tronu de Satán, y cree tamién que'l sarcófagu qu'apaeció nel templu pertenez a la madre del rei Ramiro, que lu mandó construir a mediaos del sieglu IX.

La saga en cómic sobre la historia de la monarquía asturiana va echar el piesllu pa últimos d'esti añu cola apaición del volume XXV. Pa entós, la editorial Llibros del Pexe cuenta con asoleyar un volume axuntando les 25 entregues de la serie.