Los trabayadores de RTVE n’Asturies secundaron el paru contra’l plan de saneamientu

La fuelga convocada ayeri na canal pública estatal de TV, qu'obligó a cortar la emisión del parte de noticies de les trés de la tarde, tuvo tamién un altu siguimientu ente los trabayadores de RTVE n'Asturies que los sindicatos periten nel 98% de la plantiya. L'actu principal de protesta consistió nuna concentración de trabayadores énte les oficines de Radio Nacional d'España n'Uviéu, cortando'l tráficu dellos minutos .

La plantiya asturiana de RTVE ígüenla los 57 trabayadores del Centru Territorial de TVE y otros 45 que se reparten ente les emisores de Radio Nacional d'España d'Uviéu y de Xixón. Los trabayadores reclamen que'l Gobiernu intervenga y retire los planes de saneamientu de la empresa porque la empobinen a la so desapaición. En concretu, nel casu asturianu'l plan llevaría al pieslle de la emisora de RNE5 de Xixón, especializada n'informativos y na que trabayen 11 profesionales qu'ellaboren 14 boletinos informativos locales que se pasen ente les 8.25 y les 21.25 hores. La mengua de la producción informativa supondría tamién una perda de protagonismu d'Asturies nos conteníos xenerales de RNE.

El tisoriazu de plantiya que se quier aplicar en RTVE dende la SEPI a más de 4.000 trabayadores del ente RTVE en tol Estáu, criticóse duramente dende les asociaciones profesionales como la de la Prensa d'Uviéu, que recordó que la pública española ye de les radiotelevisiones con menos plantiya de toa Europa y qu'encamentó esperar hasta que s'apruebe la llei nueva de Radiotelevisión que tien d'apautar el tipu de mediu públicu qu'ha existir nel futuru.