Asturies ye la única comunidá que llibra del peligru de desertificación según Mediu Ambiente

"Un total de 928.250 hectárees n'España, ye dicir, un 2% del territoriu, ta en riesgu ""mui altu"" de desertificación, según datos del Ministeriu de Mediu Ambiente, recoyíos nel documentu de Trabayu del Programa d'Aición Nacional escontra la Desertificación, de xunetu del 2007. Asturies llibra, sicasí, del peligru d'esti fenómenu. Castiella-La Mancha (203.362 hectárees), Andalucía (199.720), Murcia (194.599), Canaries (155.159) y Valencia (126.263) son les rexones con más superficie en riesgu altu de desertificación.

Pero amás, otres 48.159 hectárees tán nesta mesma situación repartíes ente Castiella y Llión, Cataluña, Baleares, Estremadura y Madrid. La desertificación mídese, según la ONU, sobre la base d'indicadores físicos y biolóxicos, como sequedá, erosión (perda de suelu), incendios (proporción de superficie acumulada dañada pol fueu) y sobreesplotación de acuíferos. Nel futuru, a estos factores ta previsto sumar los de calter socioeconómicu.

En conxuntu, más d'un terciu de la superficie española sufre riesgu de desertificación porque amás del más altu, tienen un peligru altu de sufrir esti problema otres 7,3 millones d'hectárees; riesgu mediu, 9,5 millones d'hectárees y riesgu baxu, 18,8 millones. Sólo Asturies y Galicia se llibren del peligru de la desertificación, cualquier que seya la so intensidá. Les zones má afectaes son les Isles Canaries, xunto col sureste de la Península, particularmente Alicante, Murcia, Almería, Granada, l'oeste d'Albacete y el sur de Cuenca, con amplies árees con peligru de desertificación ""altu"" o ""mui altu"". Tamién destaquen el suroeste de Córdoba y el sur de Xaén, con grandes estensiones afectaes por un riesgu ""altu"", asina como la provincia de Tarragona y la costa de Castellón. Por comunidaes autónomes, otra vegada Canaries y Murcia son les que tienen una mayor proporción de superficie con peligru significativu de desertificación, con cerca del 80 por cientu del so territoriu amenazáu. Síguenles Castiella La Mancha, Comunidá Valenciana y Andalucía, con más del 50 por cientu.

Pero son Andalucía y Castiella La Mancha les que, en términos absolutos, tienen mayor superficie afectada, con más de cuatro millones d'hectárees caúna. Mui perbaxo ta Aragón, siguida de la Comunidá Valenciana, Estremadura y Castiella y Llión, con dalgo más d'un millón d'hectárees. Amás, España ye'l país más propensu a sufrir los efectos de la desertificación d'ente tolos de la costa norte del Mediterraneu, según l'Axencia Europea de Mediu Ambiente. Ello débese a la so morfoloxía montañosa con fasteres arispies, les fuertes lluvies con gran capacidá erosiva, condiciones climátiques que van dende subhúmedes hasta semiseques, temperatures y precipitaciones mui variables d'un añu a otru y la existencia de sistemes sobreesplotaos debío al ""delicáu"" balance ente la disponibilidá y el consumu d'agua. Amás, en zones como'l llitoral mediterraneu, añádese una ""creciente"" presión demográfica y turística.

Pa lluchar escontra la desertificación, el Gobiernu prevé desarrollar un Programa d'Aición Nacional de Llucha escontra la Desertificación nel marcu del Plan Estratéxicu Nacional de Patrimoniu Natural y de la Biodiversidá, según establez la Estratexa Española de Desarrollu Sostenible. Esta iniciativa va completase col Plan Forestal, que propón establecer una cubierta vexetal a llargu plazu nes superficies más erosionaes pa la prevención d'incendios, asina como executar les tecnoloxíes hidráuliques necesaries pa llograr pendientes de compensación, que favorezan la infiltración del agua y recarga d'acuíferos dulces, evitando asina'l problema de la so salinidá, que ye la tercer causa de desertificación nos países mediterráneos."