El Gobiernu cuenta con que 8.000 mozos soliciten la Renta Básica d'Emancipación n'Asturies

El Gobiernu del Principáu tien previsto qu'un máximu de 8.000 persones soliciten nel 2008 les ayudes a la Renta Básica d'Emancipación nel primer añu d'aplicación d'esta midida. Esa cifra va suponer una inversión de 20 millones d'euros en polítiques actives de vivienda vinculaes al fomentu del alquiler. El datu foi ofrecíu güei pol director xeneral de Vivienda, Enrique Álvarez, nuna rueda prensa n'Uviéu na que presentó'l programa d'ayudes de la Renta Básica d'Emanicipación pa los mozos baxo la conseña 'Vive la to vida'.

Trátase d'una ayuda nueva de 210 euros al mes pal pagu del alquiler cola que, según informó esta mañana el Director Xeneral de Vivienda "preténdese ayudar a los mozos que tienen dificultaes n'independizase al non contar con una ufierta de vivienda n'alquiler económicu y de calidá". Según esplicó, la cifra de 8.000 demandantes como máximu básase nos datos del Institutu Nacional d'Estadística (INE) y del vixente Plan de Vivienda n'Asturies. De magar güei van poder solicitar esta nueva ayuda al traviés del portal d'Internet www.asturias.es y nes oficines de la Conseyería d'Infraestructures, Política Territorial y Vivienda. "Teniendo en cuenta la sencillez d'estes ayudes, les solicitudes van tramitase de manera áxil, comprometiéndose'l Principáu d'Asturies a resolver nel plazu máximu de 2 meses", señaló'l dirixente rexonal. Señaló que la mañana del 2 de xineru unos 60 mozos ya s'averaren a les oficines d'Uviéu y Xixón interesándose poles ayudes.

Enrique Álvarez esplicó que'l Gobiernu del Principáu d'Asturies, amás de "caltener y reforciar" los sos compromisos y esfuercios nel accesu en Propiedá, apostó xunto col Ministeriu de Vivienda por esta nueva llinia d'ayudes p'ampliar les posibilidaes d'elección de los ciudadanos. Recordó que'l Ministeriu de Vivienda y el Principáu d'Asturies firmaron un conveniu'l pasáu 21 de payares del 2007, que permite desarrollar n'Asturies el Real Decretu 1472/2.007, del 2 de payares, pol que se regula la renta básica d'emancipación de los mozos. D'alcuerdu con esa norma y col conveniu, el Principáu d'Asturies va tramitar y aprobar, nel so casu, toles solicitudes que se presenten de magar el 1 de xineru, fecha na qu'entra en vixencia esta nueva ayuda. Los mozos tienen el compromisu de dambes alministraciones d'atender a toles solicitudes que cumplan los requisitos del Real Decretu.

Nesti casu, nun hai un númberu máximu asignáu al Principáu d'Asturies, tal y como asocede n'otres figures del Plan. Con esta midida, amás de beneficiar a los mozos, benefíciase a los propietarios de viviendes, meyorando la tresparencia y la seguridá del mercáu de viviendes n'alquiler, según el director. La Conseyería d'Infraestructures, Política Territorial y Vivienda va desarrollar aiciones d'información con otres alministraciones, instituciones y axentes qu'ayuden a espardir esta nueva ayuda, facilitando l'accesu a la mesma. Nesti sen, Enrique Álvarez avanzó contactos cola Dirección Xeneral de Mocedá pa establecer un canal de comunicación directu col Institutu y el Conseyu de la Mocedá d'Asturies. Sobre una hipotética subida de los alquileres como resultáu d'esti tipu de midíes, Enrique Álvarez, refugó tal estremu y dixo que lo que precisamente ta potenciándose ye'l desarrollu d'un mercáu qu'agora mesmu nun existe. Dixo que nun se detectó xuba nenguna nel preciu de los alquileres.