La obra de Menéndez Pidal, a estudiu en Lleón con motivu de los sos cien años

El "Instituto de la Lengua" de Lleón entamó ayeri unes xornaes de debate y homenaxe al estudiosu del idioma Ramón Menéndez Pidal con motivu de los cien años de l'apaición de la so obra "el dialecto leonés" cola qu'entamaron los estudios filolóxicos académicos sobre la llingua asturiana.

La figura de Ramón Menéndez Pidal (1869-1968) y la so obra investigadora centren estes xornaes qu'entama el "Instituto Castellano y Leonés de la Lengua" cola collaboración de la Universidá de Lleón y la Diputación Provincial. Cerca d'un cientu de persones participaron ayeri na primer xornada del seminariu, que va espurrise hasta mañana vienres y qu'inauguró l'académicu de la llingua española José Antonio Pascual nel aula magna de la universidá lleonesa.

L'oxetivu d'estes xornaes qu'axunten a filólogos y espertos de toa España, ente ellos el director de Política llingüística d'Asturies Ramón d'Andrés, que va dar una ponencia nelles, ye per una parte'l de facer alcordanza d'esti llingüista clave pa la filoloxía moderna, pero tamién el d'analizar l'estáu actual del dominiu llingüísticu lleonés en tola so estensión, dende Asturies a Salamanca pasando per Miranda en Portugal y facer comparanza col estáu que presentaba esti dominiu llingüísticu va 100 años cuando Menéndez Pidal escribió "El dialecto leonés".