Entrega del premiu de la Fundación de la Sidra

Esti miércoles 29 de marzu, a les 20:00 h el presidente asturianu Vicente Álvarez Areces va facer entrega nun actu que va tener llugar en Torazu (Cabranes) del premiu añal de la Fundación de la Sidra, que foi nesta edición pal llagareru inglés John Thatcher. Enantes de la entrega del premiu, el prestixosu industrial inglés de la sidra va dar esti martes 28 una conferencia que, baxo'l títulu “Pasáu y Futuru de la Industria de la Sidra” va entamar a les 8 de la tarde na sede de la Fundación José Cardín Fernández de Villaviciosa.

La Fundación de la Sidra, na que tan presentes los principales conceyos d'Asturies, les Conseyeríes de Mediu Rural y Cultura y l'Asociación d'Hosteleros xunto cola Asociación de la Sidra, lleva entragando dende l'añu 2001 esti premiu dotáu con 6.000 euros y una obra del escultor maliayés Pablo Maojo que reconoz el llabor de los industriales, artesanos, divulgadores y estudiosos que faen pol mundu de la sidra. Ente les iniciatives reconocíes por esti premiu hailes asturianes como la de la Carpintería Terán pa recuperar toneles de castañu y estranxeres, como ye'l casu de la casa francesa "Ferme de l'Hermitière" productora de mazana, sidra y otros derivaos en Normandía. Nel casu del premiáu 2005, el llagareru inglés John Thatcher, asitiáu en Somerset, el premiu reconoz los 40 años en sector d'un profesional que garró una empresa familiar fundada nel 1904 convertiéndola nuna de les 5 mayores productores de sidra del Reinu Uníu. Nestes cuatro décades, Thatcher's Cider pasó de facer namás una frasca de sidra a producir 40 distintes, dende monovarietales de mazana hasta sidra de mazanes estremaes mecíes pasando per "delicatessen" como sidra fecho en pipa de ron. Thatcher's cider ye tamién una casa qu'investiga'l desarrollu del frutu, y anguaño ta llevando alantre una finca onde s'esperimenta coles variedaes de pomares y los sistemes de plantación.