El Gobiernu asturianu enfótase en que l'anuncia d'ETA sía'l primer pasu pa la paz

El presidente asturianu Álvarez Areces declaró que l'anuncia d'ETA yera algo que "s'esperaba" y qu'elli recibía "con contentu y enfotáu énte un momentu históricu" en cuantes qu'abre "una puerta pal fin de la violencia terrorista d'ETA" anque al empar aclarió que l'anuncia había interpretase "con muncha prudencia pol difícil llabor que queda per delantre". Énte l'anuncia de "altu'l fueu permanente" pola organización terrorista, el presidente d'Asturies treslladó'l sofitu del so Gobiernu al del presidente Zapatero "y a los que trabayaron pa qu'esto fuere posible". Areces emponderó'l papel de les fuerces de seguridá na llucha contra ETA y pidió que se caltenga la memoria de les víctimes nel procesu qu'entama agora.

El conseyeru de Xusticia y rellaciones esteriores, Javier Valledor, tamién se congració de l'anuncia d'ETA que calificó de "una escelente noticia en cuantes que ye la condición indispensable para poder entamar un procesu, que, anque difícil, complexu y llargu" puea conducir a la paz, sorrayando que se precisaba pa ello "la unidá de los demócrates dimpuestos a da-y una oportunidá a la paz".

Pela parte de la oposición al Gobiernu asturianu na Xunta Xeneral, el presidente del PP Ovidio Sánchez foi'l que fizo una interpretación más negativa de la declaración d'ETA, afirmando que la organización terrorista declaraba l'altu'l fueu "cola intención de rearmase" porque "lo único que quier ETA ye la rindición del Gobiernu d'España".

L'arzobispu d'Uviéu Carlos Osoro emitió tamién una valoración oficial sobre l'anuncia d'ETA. El comunicáu de la Ilesia Asturiana fala tamién d'enfotu nes posibilidaes que s'abren dende agora y Osoro afirma que "Espera qu'esta decisión suponga qu'ETA dexe de matar, fechu indispensable pa contribuyir a la paz". Osoro declaró que "La paz lleva arreyada'l respetu a la vida y la concordia ente los pueblos". Osoro camienta que se pue contribuyir a "una reconciliación efectiva" al empar que quier declarar el so allegamientu a les víctimes.