La Coordinadora Ecoloxista pide midíes contra la contaminación en Trubia

La Coordinadora Ecoloxista denunció ayeri que los niveles de contaminación del aire en Trubia (Uviéu) son muI altos y que, acordies coles mediciones oficiales del Principáu d'Asturies, perpasen los topes encamentaos pa la salú, polo que-y pide al Conceyu d'Uviéu que nun autorice la construcción d'una central térmica en Caces.

La organización asegura que se pasaron los topes encamentaos en partícules en suspensión, un total de 90 díes nel añu, cuando la llei apauta qu'esto nun asoceda más de 35 díes per añu, llegándose a un valor récord puntual de 685 ug/m3 de partícules, lo que representa un valor 32 vegaes penriba del tope. La Coordinadora afirma que los niveles más altos de contaminación por partícules conseñáronse siempre na estación de midida asitiada al llau de les naves de la empresa Industrias Doy, sobremanera nos meses d'agostu y setiembre.

Los niveles d'ozonu, gas qu'enrita y inflama mucoses respiratories, tamién s'asitiaron fuera de les recomendaciones llegales hasta en 61 díes del añu, llegándose incluso a ún día en que la concentración d'esti gas foi tan alta que se llegó al nivel qu'obliga a apurrir información público ensin qu'esta se llegare a dar. Hasta 10 vegaes nel añu se perpasaron tamién los niveles encamentaos de dióxidu d'azufre, axente que provoca enfermedaes respiratories cróniques y qu'agrava l'alerxa respiratoria y l'asma.

La Coordinadora llama por too ello al Conceyu a "asumir les sos responsabilidaes y trabayar pa que se reduzan estos niveles de contaminantes" qu'afirma que se dan pol consentimientu alministrativu con una industria "que funciona en precario".