Víctor Manuel pide la oficialidá del asturianu al traviés d'un videu na campaña doilacara.net

El cantante Víctor Manuel acaba d'añadir el so videu a la llista de declaraciones de persones de proyeición pública a favor de la oficialidá de la llingua asturiana, que la Xunta pola Defensa de la Llingua subió a la direición http://es.youtube.com/user/doilacara

La declaración del cantante ye de les más esperaes dientro del movimientu a favor de la llingua asturiana, pola gran cantidá de siguidores colos qu'esi artista cuenta tanto dientro como fuera d'Asturies. Amás, a lo llargo de la so carrera incluyó nos sos discos dalgunos cantares n'asturianu. Sin embargu, nunca hasta agora se pronunciare abiertamente a favor de la oficialidá, y de fechu anteriormente realizare declaraciones contraries a esa reivindicación.

Xunto col de Víctor, tán yá espuestos al públicu en dicha direición d'internet los vídeos de les escritores Corín Tellado y Carmen Ojeda, el piragüista Manuel Busto, la presentadora de televisión Sonia Fidalgo, el ciclista Chechu Rubiera y el gaiteru José Ángel Hevia. La Xunta anunció qu'en próximes feches van publicase nueves declaraciones.

La demanda d'oficialidá d'estes persones súmase a la d'otros personaxes conocíos, como son los deportistes que na última gala solidaria del deporte asturianu accedieron a facer la semeya enseñando'l cartel col mensaxe 'Doi la cara pola oficialidá', ente los que tuvieron el futbolista Santi Cazorla, el ciclista Samuel Sánchez o l'árbitru Mejuto González. Anteriormente, tamién mostraron el so apoyu Quini y David Villa.