La escritora Berta Piñán asoleyó estos díes la so obra más recién "El branu de Myrtia", un llibru empobináu al públicu xuvenil editáu pola casa Ámbitu y que cuenta l'alcuentru ente una neña d'ocho años que ve camudar el so mundu infantil por causa del procesu de separación de los sos padres y qu'alcuentra a Mirtya, una muyer sudamericana que trabaya en casa de la tía, onde ta pasando'l branu.
Según apunta la presentación del llibru "La entrada a la última etapa de la infancia plantégase nesta narración como un viaxe hacia un mundu de situaciones y personaxes nuevos" ello acompañao poles ilustraciones de Pablo Amargo, ún de los dibuxantes asturianos de más prestixu nacional e internacional. La editorial afirma que la obra de Berta Piñán afonda na filosofía de la so colección de lliteratura infantil y xuvenil, que quier despertar nel públicu l'interés pola llectura en llingua asturiana por mediu del trabayu de los meyores escritores y ilustradores asturianos, siendo denominador común de tolos llibros el que los autores faigan de los rapazos los protagonistes d'estos relatos col planteamientu de situaciones y problemes que-yos son familiares.