"Dalguién tien de parar esto, por favor", diz el Padre Ángel, tres tar unes hores en Gaza

El presidente de l'Asociación Mensaxeros de La Paz, el cura asturianu Ángel García, conocíu como Padre Ángel, tuvo güei en Gaza, a onde se treslladó per carretera dende Xordania pa repartir tonelaes de material sanitariu, melicamentos y alimentos. Dende ellí, reclamó que se detenga l'aición militar na franxa de Gaza. "Dalguién tien de parar esto, por favor", reclamó.

En declaraciones a Europa Press, el sacerdote asturianu relató qu'en Gaza'l panorama ye "dantescu". "Hai más de 300 neños muertos, dalgunos tirotiaos nel pechu". Añadió que tamién lu impresionó'l númberu de firíos, "dalgunos d'ellos ciegos", comentó.

Sin querer entrar en polémiques de tipu políitcu, solicitió que se detenga'l "xenocidiu" que se ta produciendo. "Nun se trata d'echar culpes a naide, lo qu'hai que facer ye parar la guerra porque nun ye posible que lo que güei vi se tea produciendo de verdá", dixo'l Padre Ángel.

En rellación al viaxe de güei, el Padre Ángel dixo que pudo entrar nel territoriu de Gaza gracies a la ministra de Bienestar Social de Xordania. Ye precisamente n'Amman, la capital de Xordania, onde tien constituyida Mensaxeros de la Paz una sede, dao que yera un llugar "estratéxicu" pal repartu d'ayuda pa Irak. Agora tamién lo ye pa la zona de Gaza.

El padre Ángel entama güei de vuelta a España, pero tien previsto volver a la zona de Gaza nunos díes. "Vamos volver con mélicos y con más cargamentu, porque mos acaba de llegar una nueva ayuda procedente de Canadá", anunció.