La Conseyería asturiana de Bienestar Social anuncia un plan d'inversiones p'ampliar el númberu de places residenciales

La conseyera asturiana de Bienestar Social y Vivienda, Noemí Martín, anunció güei la puesta en marcha d'un Plan Asturianu d'Inversiones Sociales que va permitir planificar la creación de nueves places en residencies, centros de día y centros de dicapacidá, pa responder a les necesidaes de la sociedá asturiana y garantizar l'apropiada aplicación de la Llei de Dependencia.

Nesti sen, la conseyera destacó, enantes d'asistir a la primer xunta del Conceyu d'Alministración del ERA dende que se produxere'l relevu al frente de la Conseyería, que'l presupuestu del Organismu Autónomu d'Establecimientos Residenciales d'Asturies (ERA) cuenta yá con 14 millones d'euros pa inversiones.

L'Organismu Autónomu tien nestos momentos 2.114 solicitudes de places residenciales, mientres que'l númberu de places pasó de 3.450 nel 2007 a 3.434 nel 2008. Nesti momentu, l'ERA xestiona directamente 23 residencies públiques, con un total de 2.444 places, y caltién concertaes con entidaes privaes otres 818 places. De les 3.434 places, 3.262 places son en residencies y 172 places son n'apartamentos. En cuanto a Centros de Día la Conseyería cuenta con un total de 1.066 places repartíes en 36 centros.

"Cuando asumimos la responsabilidá de xestionar esta Conseyería yéremos conscientes de qu'hai una lista d'espera mui importante pa poder acceder a una plaza residencial, poro yá tamos trabayando p'ampliar el númberu de places, tanto públiques como concertaes, non sólo en residencies sinón tamién en Centros de Día", dixo. La conseyera afirmó amás que "nel 2009 yá se va poder contar con unes 600 places residenciales de nueva creación, teniendo en cuenta les obres que yá tán acabando y los nuevos conciertos".

La Conseyería yá tien prevista l'abertura nel 2009 de cuatro nuevos centros en Sotrondio, Siero, Xixón y la Tenderina n'Uviéu. Martín tamién apuntó que "cola puesta en marcha d'esti Plan Asturianu d'Inversiones Sociales lo que se pretende ye poder concentrar l'esfuerzu onde más demanda hai". "Tovía tamos estudiando los númberos, pero seguramente teamos falando de la zona central --Uviéu, Xixón, Aviles y les cuenques--, más allá de qu'hai que siguir dando respuesta a les de la Rexón", acabó.