Asturies va tener 78 policíes "autonómicos" enantes de que termine'l 2006

El Secretariu d'Estáu de Seguridá, Antonio Camacho, y la Conseyera de la Presidencia, María José Ramos, tuvieron ayeri una xunta pa tratar l'entamu de la Comisión Mista pa la creación Unidá de Policía Nacional venceyada a Asturies. 78 axentes de distintes categoríes van iguar esta unidá sobre la que'l Gobiernu asturianu va tener competencia funcional.

Según s'apuntó dende Presidencia, la puesta en serviciu de la Unidá Policial Venceyada a la Comunidá Autónoma supón el da-y cumplimientu al artículu 20.2 del Estatutu d'Autonomía, que-y otorga al Principáu la facultá de tener una Policía alministrativa. Amás d'anunciase que 8 d'estos axentes van iguar la brigada específica sobre'l xuegu, de la entrevista d'ayeri salieron los emblemes que va llevar esta unidá policial. La imaxe qu'acompaña esta información correspuende col distintivu que van llevar n'uniforme, que va ser el mesmu que'l de los demás policíes nacionales, mientres que na gorra van llevar l'escudu oficial de la comunidá autónoma. Les unidaes móviles d'esta unidá tamién van llevar l'escudu y emblemes oficiales d'Asturies.

Otramiente, dientro del cuerpu policial va entamar d'equí a poco'l concursu de méritos pa los axentes que quieran entrar nesti cuerpu La esbilla de candidatos va mandase polos mesmos requisitos llegales qu'otros concursos, anque van tenese en cuenta criterios d'enraigonamientu n'Asturies de los candidatos. La unidá va entrar en funcionamientu nel segundu semestre del añu.