El Sporting de Xixón arrampuñó un puntu en campu del Recreativo

El Sporting, que diba a Huelva ensin dellos de los sos meyores xugadores y dempués de perder en Molinón per primer vegada esti añu, foi una muria defensiva que'l decanu del fútbol español nun pudo pasar. Biagini y Calandria tuvieron les meyores ocasiones pal equipu de Xixón nun partíu más entreteníu de lo que diz el marcador, sobremanera nel segundu tiempu.

El Recreativo de Huelva, equipu qu'entrena l'ex - preparador del Sporting Marcelino García, salió a afogar al conxuntu qu'entrena Ciriaco Cano, apertando muncho sobre la salida de los xugadores asturianos. Sicasí, los xugadores del equipu andaluz nun yeren a materializar el so dominiu en daqué ocasión de gol. A lo llargo del primer tiempu, el Recreativo foi soltando amarraderes cansu d'un xuegu de tantu desgaste y el Sporting pudo allegase más a la portería del rival, creando Biagini la primer ocasión clara pal equipu asturianu. Nel segundu tiempu, el Recreativo volvió a poner la directa y zarró al Sporting nel so campu. Énte ún de los equipos de mayor presupuestu de la categoría, los de Ciriaco Cano aguantaron con orde atrás y emplegaron el recursu a la contra pa tentar de sorprender, cosa que tuvo nun tris de llograr Calandria nun tiru que pasó cerca del palu de la portería de Toño. Foi un final intensu nel que'l recreativo tamién tuvo la so opción nuna entrada nel área de Calle qu'atayó Roberto nuna estupenda salida.