"Préstanos muncho porque ye un premiu que da la xente"

Asturies.com faló con Skama la Rede, grupu ganador col cantar "Internacionalista" del Premiu Asturies.com al Meyor Cantar n'Asturianu 2005. El grupu comentó a esti diariu les sos impresiones al recibir el Premiu amás de dellos de los sos proyectos de futuru.

Skama la Rede vien a xuntase al restu de ganadores d'esti Premiu, como Gatos del Fornu con "Brañas d'antañu" en 2003 y Skanda con "Sangre d'ochobre". Skama la Rede vivió en 2005 un añu mui movíu que vieno a rematar algamando esti Premiu Asturies.com al meyor cantar n'asturianu.

Miguel Fernandi "Burilo" cantante d'esta banda moza de ska-rock, amosó la satisfacción del grupu, y declaró que "tamos percontentos y préstanos muncho recibir esti premiu porque nun contábemos con ello. De mano yá nos sorprendió abondo tar ente los finalistes porque yera una selección abierta y hai munchos grupos y cantares". Amás el cantante del grupu quixo rescamplar "que gústanos muncho recibir esti premiu sobre too porque ye un premiu que da la xente". En rellación a los otros cantares colos que compitieron na final pa Miguel Fernandi "son bastante representativos de lo que se vien faciendo de música n'asturianu, ya qu'hai un cantar rock-ska como ye'l nuestru, el folk acústico de Corquiéu con "Llara" y propuestes nueves na música folk con "Na Caleya" de La Bandina". Anque de toes maneres Burilo apuntó que "toos aquellos que faen música n'asturianu mereceríen esti premiu".

Otramiente, faciendo repasu de lo que foi esti 2005 pal grupu, Miguel comentó que "entamamos l'añu mui centraos nel discu, y el tema de los conciertos teníemoslu un poco como apartáu. Pero cuando salió'l discu prestónos muncho porque los conciertos cambiaron. Anque enantes la xente baillaba y pasábalo bien nos nuesos conciertos, de la que salio'l discu prestó muncho ver que'l públicu sabía les lletres y eso cambió en dalgo los nuesos directos". En Skama la Rede tamién tan contentos con como ta funcionado'l discu "dende que lu sacamos n'agostu yá van cerca de 1.000 copies vendíes".

El futuru pa esti grupu de la zona del Cabu Peñes albídrase enllenu de proyectos. "De mano tenemos el movil ferviendo de conciertos pa esti branu. Tán saliéndonos munches feches pa tocar, per munchos sitios, y amás guapamente vamos volver tocar en Getxo onde yá tuvieremos l'añu pasáu y nos prestare en grande l'actuar". No que cinca a proyectos discográficos "yá tenemos la mente puesta en sacar discu nuevu pa 2007, porque la nuesa idega ye dir asoleyando un discu cada más o menos dos años".

Dende Asturies.com solo queda felicitar otra vuelta a esti grupu, animar a tolos músicos que trabayen n'asturianu pa que l'añu qu'entra vuelvan a ser munchos los cantares que puyen por esti premiu al Meyor Cantar n'Asturianu.