El conseyeru de Mediu Ambiente defendió la incineración

El conseyeru de Mediu Ambiente Francisco González Buendía declaró ayeri na Xunta Xeneral del Principáu en medio de la polémica pola construcción de la incineradora de Serín qu'asumía'l compromisu de buscar una solución de consensu al asuntu, pero afirmó que ye preciso alcontrar una igua pa los residuos que nun puen reciclase en cuantes que'l vertederu "ta escosando" siendo amás que pa elli la solución más afechisca ye la de la incineración, que llamó "valorización enerxética".

En rempuesta a la entruga sobre la incineradora que plantegare'l grupu parlamentariu del PP na Xunta Xeneral, Buendia recordó que la decisión de facer esta instalación llevaba tiempu tomada, pero disvió a la responsabilidá de los conceyos les actuaciones del ente de residuos Cogersa en cuantes que'l Gobiernu asturianu namás tien un 20% nel organismu mientres que los conceyos disponen d'un 80%. Buendía que defendió a Cogersa por tar faciendo "un apueste fuerte" nes sos polítiques de reciclaxe, asegurando que cumple los oxetivos de la llexislación vixente nesti sentíu -Llei d'envases de 1997- y ta al mesmu nivel qu'otres comunidaes "como reconoz l'estudiu que presentare apocayá una importante organización ecoloxista" en referencia al informe de la organización Greenpeace -qu'en realidá ye mui críticu colos niveles de reciclaxe que se dan en tol estáu-.

En cualquier casu, Buendia centróse en defender l'alternativa de la planta incineradora, pa lo qu'aportó datos. Amás d'entrugase si los europeos que viven na contornada de les 400 plantes de reciclaxe qu'hai en continente son "masoquistes" Buendía fizo de menos los efectos contaminantes d'estes plantes, de les que dixo qu'emiten valores de dioxines mui perbaxo d'otres industries y siempre dientro d'unos niveles que nun yeren dañibles p la salú humana. El conseyeru llegó a afirmar qu'un vecín d'una incineradora asimilaba 110 unidaes de dioxines al añu mientres qu'una persona fumadora asimilaba 700.000 y que les dioxines emitíes por una central d'esti tipu nun representaben una cantidá nin siquiera apreciable.