Andecha Astur denuncia’l derribu d’una casona del sieglu XVI en Noreña

Esta selmana derribóse na Cai Sorribes de Noreña una casona que databa del sieglu XVI. L'agrupación d'Andecha Astur nesti conceyu emitió un durísimu comunicáu en que condena la perda d'esta pieza del patrimoniu asturianu, que diz que gozaba de protección llegal. L'agrupación nacionalista asegura que l'inmueble yera propiedá del arquitectu del conceyu y alvierte que va investigar les responsabilidaes que puean venir d'ello.

L'agrupación d'Andecha Astur Noreña denuncia qu'anque vien trabayando pa salvar la Casona de la cai Sorribes dende va yá 7 años, les sos denuncies de la situación, peticiones de d'actuación d'urxencia ente l'Ayuntamientu y de que l'Alcalde informare públicamente de la situación "nun tuvieron enxamás rempuesta nenguna y el gobiernu municipal nun fizo nada pa iguar esta bochornosa situación d'abandonu del patrimoniu".

AA de Noreña quería que dende'l conceyu se buscare la formula dientro de la Llei de Patrimoniu "que garantizare la supervivencia de la casa más antigua de la villa", pero, ensin que se llegare a nenguna igua, la casa foi esfaciéndose hasta qu'esta selmana acabó por procedese al derribu de los restos qu'inda se calteníen.

Xunta esto, el partíu políticu asegura que nel Rexistru de la Propiedá de La Pola Siero, la histórica casona "figura a nome de Joaquín García Pumarino Ortea, que vien exerciendo d'arquitectu municipal" dalgo que p'Andecha Astur de Noreña abulta raro enforma y polo que "esixe aclaraciones del gobiernu municipal" al empar que da anuncia de que "va trabayar por aclariar les responsabilidaes llegales y polítiques que puean derivase del esbarrumble d'una casa catalogada".