El Congresu dio-y el preste a la proposición del PSOE sobre plurillingüismu n’España

El Congresu de los Diputaos trataba ayeri una proposición non de llei presentada pol grupu socialista na que s'emponderaben los llogros del plurillingüismu nel Estáu Español. La iniciativa del PSOE, que tuvo'l votu a favor de CiU, IU-ICV, CC y BNG, contó coles abstenciones d'ERC y PNV y el votu en contra del PP, grupu que presentaba otra proposición, esta refugada, na que se reconocíen tamién los beneficios del plurillingüismu pero na que se pidía "que nun se persiguiere a los ciudadanos pola llingua qu'empleguen" en rellación a la política llingüística pola que se manda Cataluña.

La iniciativa del PSOE fai un apueste por garantizar "el respetu y la protección de les distintes llingües españoles" y defende "el derechu y la llibertá d'escoyer y emplegar cualquiera d'elles" reconociendo los beneficios en materia de convivencia democrática qu'aportó la cooficialidá de les llingües minoritaries del estáu nes comunidaes onde se da esti réxime. Los términos en que ta redactada la proposición del PSOE y l'espíritu de lo que defende llevaron la selmana pasada en conociéndose de la so esistencia, a qu'organizaciones de defensa del asturianu llamentaren que'l partíu socialista defendiere pal restu d'España y nuna instancia como'l Congresu de los diputaos les ventayes d'un plurillingüismu basáu na cooficialidá que nun quier reconocer n'Asturies.


Organizaciones como'l Conceyu Abiertu pola Oficialidá, que señaló al traviés del so portavoz Fernando Ornosa que "que'l PSOE pida esto en Madrid y equí faiga otra cosa ye una contradiccion evidente" o la Xunta Pola Defensa de la Llingua, que recuerda que la proposición del PSOE "niega dafechu les tesis de la FSA y asegura que la oficialidá representa derechos, convivencia y llibre elección" sorrayaron esta contradicción, ello amás nunos díes en que les declaraciones de la Conseyera de Cultura Ana Rosa Migoya, qu'aseguró que la cooficialidá del asturianu "diba ser una imposición pa los ciudadanos" enraxonaron más l'ambiente n'Asturies.