Once llibros compiten pol premiu de Narraciones Trabe

La casa Trabe va dar a conocer esti xueves 9 de febreru'l fallu del Premiu de narraciones n'asturianu que convoca la casa editorial y que ta dotáu con un primer premiu de 3.000 euros.

Son 11 los orixinales qu'opten a esti Premiu de Narraciones Trabe 2005, que se recupera dempués de diez años ensin convocase. Trátase de cinco noveles y seis llibros de cuentos llegaos d'Asturies, del restu d'España y incluso del continente americanu, d'au vien ún de los llibros que compiten pol premiu. Esti consiste na publicación de la obra ganadora dientro de la colección «Incla interior» d'Ediciones Trabe, amás de 3.000 euros en conceptu de derechos d'autor y una escultura orixinal de María Jesús Rodríguez fecha pal premiu entitulada "So la panera-8".

Estos datos faen del premiu de Trabe'l segundu más importante en dotación económica de los qu'hai dedicaos a la narrativa n'asturianu tres del "Xosefa Xovellanos" que convoca la Conseyería de Cultura.

Dende la editorial Trabe destácase l'alta participación y el nivel de calidá de les obres presentaes, qu'albidra que va facer riñíu'l fallu del xuráu, compuestu pola escritora y ganadora del «Xosefa de Xovellanos» de novela Esther Prieto, l'escritor y periodista José Luis Fernández, el profesor d'asturianu na Universidá d'Uviéu Xulio Viejo, el filólogu de la Conseyería de Cultura Luis Casteleiro y la escritora y ganadora del «María Josefa Canellada» de narrativa Consuelo Vega. El secretariu del xuráu, con voz pero ensin votu, va ser l'editor Antón García.

Ediciones Trabe convocó nuna primer etapa, dende 1992 a 1995, cuatro ediciones d'esti premiu con éxitu de participación, de crítica y de públicu. Los ganadores resultaron ser Miguel Rojo en 1992 cola novela "Histories d'un seductor, (Memories d'un babayu)" Santi F. Ochoa en 1993 cola novela "Los párpagos de Buda" Pablo Antón Marín Estrada en 1994 col volume de cuentos "Esa lluz que naide nun mata"
y Berta Piñán en 1995 col volume de cuentos "La tierra entero".