Graciano Torre afita que Lada Velilla va pasar per Ayer

El Conseyeru d'Industria Graciano Torre entrevistóse ayeri colos grupos que nun quieren que la llinia d'alta tensión Lada - Velilla pase pel conceyu d'Ayer. Torre díxo-yos que'l pasu de cables y torretes per Ayer nun tenía torna, mientres que la presidenta de la plataforma Maria Eugenia Díaz declaró que les postures d'unos y otros nun s'allegaron lo más mínimo.

Torre esplicó-yos a los vecinos d'Ayer que taba dimpuestu a da-yos tola información que precisaren sobre esta llinia, una de les dos que defende l'executivu asturianu pa evacuar l'escedente de corriente que produz Asturies, pero afitó que'l pasu de la llinia pel conceyu nun almitía cambeos y qu'amás yá taba apautáu cola comunidá de Castiella y Lleón ,polo que yera imposible devolver el trazáu a Casu, per onde diba salir de mano la llinia a la meseta, nin tampoco movela pa contra L.lena. Los representantes de los colectivos de vecinos opuestos a la llinia esixéron-y disculpes a Torre porque elli y el presidente Areces los llamaren públicamente "insolidarios y irracionales" y llamentaron que la llinia vaya pasar per llugares vírxenes d'Ayer dempués de refugase'l so pasu per Casu porque diba estropiar el Parque Natural de Redes, pero descartaron entamar midíes llegales contra la llinia, encomendándose al Conceyu pa que lo fixere.