Ornia defende la RTPA como creadora d’emplegu

El presidente de la TV autonómica, José Ramón Pérez Ornia, peritó en 300 los puestos de trabayu que va crear l'ente de comunicación públicu d'Asturies. Les cuentes del director de l'autonómica, que sigue coles sos emisiones en fase de prebes, son que la TV va tener una plantiya de 99 fixos y más de 200 trabayadores que van ser d'otres empreses coles que l'ente va contratar servicios.


48 d'estos trabayadores yá tan inxertos na plantiya y los demás hasta completar les 99 places que salieren a oposición y concursu-oposición nos últimos meses van facelo d'equí a la vuelta de delles selmanes. José Ramón Pérez Ornia fizo públiques estes cifres nuna conferencia sobre'l presente y futuru del Ente que-y tocó dar nunes xornaes qu'entamaba la Fundación Asturias del sindicatu UXT. Ornia adelantó tamién que la sede de la TV en monesteriu de les clarises de la Universidá Llaboral yá ta n'obres.

La TV emitió esti 21 de xineru los sos primeros anuncios comerciales, que supunxeron los sos primeros ingresos. En cualquier casu, el director del Ente afitó la idega de que l'asturiana va ser una tv autonómica de baxu presupuestu, sorrayando'l que ye la que menos ayudes públiques recibe y la que menos gastu-yos da a los ciudadanos. Amás de remachar otra vuelta la so idea de que va ser l'asturiana una canal centrada no informativo y "independiente de presiones polítiques", Ornia adelantó, no tocante a programación, que yá tan zarraos contratos con 14 productores asturianes pa la realización de programes, siendo que se cuenta con contratar a venti empreses pa esta estaya.