CAO y Xunta Pola Defensa de la Llingua condenen les declaraciones d’Ana Rosa Migoya

Les declaraciones que fixere la Conseyera de cultura esti martes a la emisora de TV Canal 10 y nes que que refugaba la posibilidá de que la reforma del Estatutu d'autonomía d'Asturies reconoza la cooficialidá de la llingua en cuantes qu'ello diba suponer "una imposición" sacaron angüeñes nes organizaciones de defensa del idioma. Conceyu Abiertu Pola Oficialidá (CAO) y Xunta Pola Defensa de la Llingua fixeron ayeri declaraciones de protesta poles afirmaciones de la Conseyera, que tamién afirmó que contra la imposición del asturianu "na FSA trabayamos pola llibertá y pola opción de poder escoyer".

Fernando Ornosa, representante del CAO declaró que "Migoya nun ye realista cuando diz que trabaya pola lliberta en cuantes que n'Asturies nun se da'l derechu a lliberta espresión nin a escoyer llingua". Pal portavoz del CAO, les declaraciones de la Conseyera "tienen un conteníu poco democráticu" y escuende'l fechu de que "la única imposición ye la que sufren los que nun puen falar asturianu". Fernando Ornosa tampoco concueya col paecer de Migoya sobre la encuesta de Francisco Llera Ramo, de la que la Conseyera dio a entender que taba amagostada. Pal representante del CAO, plataforma qu'axunta a más de cien organizaciones, "Migoya demostró asina'l so despreciu hacia'l sentimientu mayoritariu de los asturianos que quedó espeyáu nuna encuesta fecha por una persona de prestixu y qu'amás tamién ye socialista como ella".

Otramiente, el represente del CAO refirióse tamién a la proposición non de llei que tien fecha'l PSOE en Congresu de los Diputaos, y na que se fai una defensa de la lliberta pa escoyer idioma y el billingüismu nel estáu. Pa Ornosa "que'l PSOE pida esto en Madrid y equí faiga otra cosa ye una contradiccion evidente."

El Presidente asturianu Vicente Álvarez Areces tampoco nun llibró de la crítica del representante del CAO, que recordó les sos declaraciones de va delles selmanes nes qu'emponderaba'l valir como llingua del gallegu contraponiéndolu a la esistencia n'Asturies de "los bables". A Ornosa abúlta-y que "El discursu de "los bables" lleva tiempu en desusu y hai que falar nel mesmu sentíu de toles llingües, porque l'asturiana ye tanto como la gallega" y inxerta les palabres d'Areces "dientro d'un discursu tradicional n'Asturies de valorar mas lo de fuera que lo de dientro".

Ornosa declaró a Asturies.com que'l CAO vien detectando, "dende l'arrancadera del procesu de reforma estatutaria que tuvo llugar en pasando la navidá, que'l PSOE ta encerriscándose na so postura negativa a la oficialidá" y que "ta centrando tola argumentación na pantasma de la obligatoriedá" dalgo que nun se comparte dende'l CAO , que quier retrucar ente lo que-y abulta un intentu descaráu por sacar les coses de contestu inventando una imposición que nun ye tala".

En términos asemeyaos faló la Xunta Pola Defensa de la Llingua, que güei tien convocada una rueda de prensa monográfica pa tratar les declaraciones de la Conseyera. La organización denuncia "el cinismu" de la FSA al querer igualar oficialidá con imposición.