Fernández Pardo pide una postura oficial y definitiva sobre l'autopista de la mar ente Xixón y Nantes

La presidenta del Partíu Popular de Xixón, Pilar Fernández Pardo, reclamó güei a l'Autoridá Portuaria de Xixón qu'actúe de manera efeutiva pa llograr que'l proyeutu de l'autopista de la mar que va unir El Musel col puertu francés de Nantes seya una realidá lo primero posible. Fernández Pardo exixó amás un pronunciamientu "oficial y definitivu", per parte de los máximos responsables de l'Autoridá Portuaria de Xixón y de Puertos del Estáu, sobre la concesión a favor d'El Musel de la conexón col puertu de Nantes.

Al traviés d'un comunicáu, la presidenta del PP de Xixón reclamó que se concrete'l calendariu d'entamu d'esti proyeutu, del que sólo se dixo que va entrar en funcionamientu a últimos d'esti añu 2009.

Nel comunicáu Pilar Fernández Pardo recuerda que'l pasáu 10 d'avientu y a respuesta d'una entruga formulada na so condición de diputada nuna comisión del Congresu, el secretariu d'Estáu de Tresportes y ex presidente de l'Autoridá Portuaria de Xixón, Fernando Palao, manifestó la existencia de dos candidatures preseleccionaes y suxetes a la fase de negociación, como son la viguesa, con Saint-Nazaire y Le Havre, y la xixonesa, con Nantes.

Según recordó Pardo, Palao explicó que na comisión intergubernamental franco-española se taba acabando la fase de negociación ente les compañíes candidates y los gobiernos d'España y de Francia y añadió qu'esta fase diba acabar dientro del 2008 y que, tres d'ella, diba producise un acuerdu ente dambos estaos pa dotar a eses autopistes de la mar de les ayudes de 30 millones d'euros. "Tamos yá nel 2009 y nada se sabe nesti sen", dixo la dirixente 'popular'.

Y ye qu'a xuiciu de los 'populares', de manera paralela a esti procesu d'axudicación definitiva, l'Autorida Portuaria xixonesa tien que fixar yá aspeutos determinantes pa la viabilidá de l'autopista de la mara ente Xixón y Nantes, como les escales, los horarios y sobre too, los precios que van aplicase a los camiones qu'utilicen esta vía de comunicación.

"De nada diba valir la concesión de l'autopista si nun se llogra que los tresportistes per carretera opten por ella. Pel contrario, el so éxitu, que pue suponer el tresporte de 300.000 camiones añales, diba traducise nun aumentu y diversificación de los tráficos del puertu xixonés nun tiempu marcáu pola grave crisis económica que, naide duda, diba afeutar tamién al volume de movimientos que va tener El Musel", destacó Pardo.