UNA solicita que s'incluya nel catálogu d'elementos protexíos de Samartín la casa de máquines del Pozu de L'Entregu

La organización Unidá Nacionalista Asturiana (UNA) presentó una alegación al catálogu d'elementos protexíos del Ayuntamientu de Samartín del Rei Aurelio, pa que s'incluya nel mesmu a la casa de máquines del Pozu de L'Entregu. La federación de partíos considera que nun incluyir esti elementu nel mencionáu catálogu contradiz la Llei de Patrimoniu Cultural del Principáu d'Asturies.

El voceru de mediu ambiente d'UNA, Tino Fernández, señaló al traviés d'un comunicáu, qu'al so xuiciu ye "un error grave incluyir como elementu protexíu namás que'l castillete del pozu, porque ye una unidá cola casa de máquines y si nun se fai una protección integral del elementu, taría afeutándose ensin remediu a ún de los meyores exemplos del patrimoniu industrial d'Asturies, fecháu en 1909".

UNA recordó al Ayuntamientu de Samartín del Rei Aurelio que la ellaboración d'un catálogu d'elementos protexíos tien de tar orientáu a realizar la proteición más amplia posible del patrimoniu históricu y cultural del Conceyu y non pa reducir el nivel de proteición que reconoz la Llei de Patrimoniu Cultural del Principáu d'Asturies, lo que diba suponer per otra parte renunciar a ún de los elementos dinamizadores del conceyu, como ye'l so patrimoniu industrial.