La ofensiva israelí en Gaza llega al so séptimu día siguíu con 420 muertos y 2.100 firíos

La campaña de bombardeos d'Israel escontra la Franxa de Gaza llegó güei al so séptimu día siguíu con un balance provisional de polo menos 420 muertos y 2.100 firíos, según informó l'axencia palestina de noticies Maan.

Demientres la pasada nueche continuaron ensin tregua los bombardeos, dirixíos sobre too escontra zones residenciales, según l'axencia. Un palestín llamáu Foad al Matuq morrió y cuatro persones resultaron firíes esta mañana por mor del impautu de misiles israelís escontra una vivienda vacía nel campu de refuxaos de Jabalia, nel norte de la Franxa de Gaza. L'oxetivu del ataque yera la casa de nabil Matuq, hermanu del fináu.

A primer hora de la mañana, dellos misiles algamaron les viviendes de dos miembros de Hamas nel campu de refuxaos d'Al Bureij, cerca de la ciudá de Gaza. Les cases quedaron destruyíes dafechu, igual qu'otros edificios. Una de les viviendes algamaes pertenecía a Jamal Ad Durrah, padre de Muhammad Ad Durrah, el neñu que morrió polos disparos israelís en setiembre del 2000 mientres yera protexíu polo so padre, tornando la escena nuna de les imaxes de la última intifada.

Otros oxetivos de los bombardeos d'esta nueche fueron dos viviendes en Rafa, con seis firíos; una casa en Tal Al Hawa, un barriu del oeste de la ciudá de Gaza; una mezquita nel campu de refuxaos de Jabalia, con cuatro firíos y una granxa avícola na ciudá de Gaza.

ISRAEL VA PERMITIR LA EVACUACIÓN D'ESTRANXEROS

Israel va permitir qu'unos 443 estranxeros que viven na Franxa de Gaza salgan güei del territoriu, informó un militar israelí.

Munchos de los residentes estranxeros son homes o muyeres de palestinos de Gaza y los sos fíos, y qu'Israel permita la so salida vese como una posible preparación pa una escalada de los ataques.

Peter Lerner, enllaz militar israelí, indicó qu'ente les persones a les que va permitise salir hai estaounidenses, rusos, moldavos, ucranianos, turcos y noruegos. El cruce fronterizo d'Erez va quedar abiertu pa ello mañana pela mañana, anque Lerner afirmó que "non tolos estranxeros marchen nesti tipu de situaciones".