Convocada la edición 2006 del certame pa creadores mozos Art Nalón

El Certame que tolos años convoca'l Conceyu de Llangréu acuta en premios más de 12.000 euros ente toles categoríes, que son en primer llugar la d'Artes plástiques, nes estayes de pintura, escultura y grabaos y tamién la de Curtios, na que puen presentase trabayos d'hasta 30 minutos en tolos soportes y fechos del 1 de xineru del 2004 en p'alantre, siendo la fecha tope de presentación de trabayos nestes dos categoríes la del 30 de mayu de 2006. Esta mesma fecha val tamién pal certame de teatru, abiertu a compañíes non profesionales qu'amás han cumplir el requisitu de que les obres que vayan a representar, qu'han unviar filmaes nuna cinta VHS, duren un mínimu de 45 minutos. Nesta estaya, amás de los premios, van dase ayudes pal desplazamientu de los actores. Otramiente, nel certame cuentos curtios, que nun puen pasar de trés fueyes escrites a doble espaciu peles dos cares, el plazu de presentación remata'l 27 d'abril de 2006. La edá tope pa poder presentase a tolos concursos d'esta edición d'Art Nalón ye de 36 años, y los demás requisitos y condiciones, neto que los impresos que ye preciso rellenar pa presentar orixinales a concursu, puen alcontrase na web del Conceyu de Llangréu.