Andecha Astur critica la postura d’IX sobre l’urbanismu na costa asturiana

La organización nacionalista Andecha Astur emitió ayeri un comunicáu de prensa en que denuncia la "doble cara" que-y abulta que tien la coalición d'izquierdes na so acción política y más concretamente'l posicionamientu d'IX que nos últimos díes condenó la xuba de la presión urbanística sobre la costa asturiana.


Al paecer d'AA, el posicionamientu d'IX namás obedez a "cancios propagandísticos" colos qu'IX querría dar la sensación de que ta na oposición y que "nun se caltienen dende'l momentu en que la coalición robló col PSOE un pautu de gobiernu p'Asturies y pa dellos conceyos. AA denuncia qu'Izquierda Xunida critique la situación pero ensin emplegar los medios de que dispón dende'l Gobiernu asturianu, del que forma parte p'atayala calificando'l papel d'IX de "cínicu constructivu" que "permite illegalidaes urbanístiques pa llueu alloñase d'elles" o "presentase como oposición al PSOE mentanto se beneficia de la coalición con elli".

Andecha acusa a IX de querer "antroxase d'oposición, lo qu'equival a considerar a los asturianos y asturianes como inorantes" y llama a la coalición a esixir al PSOE un cambéu na so política que lleve "a parar un bon garapiellu d'actuaciones urbanístiques en conceyos como Llanes, Ribeseya y Villaviciosa, marcaes esclusivamente pola voracidá especulativa".