La TV autonómica entama a preparar a los sos periodistes

La Radiotelevisión del Principáu d'Asturies (RTPA) dio ayeri anuncia de qu'entamaba'l Plan de formación para la plantiya de los sos medios de comunicación, qu'inxerta Televisión, Radio y Diariu Dixital, con cursos que van desarrollase a lo llargo de los trés meses qu'entren y que van facer un total de 500 hores llectives, con formación específica pa les estayes de redacción, técnica y antena y conteníos.

La primer fase d'esti programa cuerre al cargu del Institutu Oficial de Radio y Televisión (IORTV) y va dase na sede del Centru Territorial de TVE n'Asturies con profesionales de RTVE que van preparar a la plantiya de la RTPA en cuestiones de producción informativa de televisión y radio, el procesu d'ellaboración de la información y la puesta n'antena pa dambos medios, con módulos especiales sobre llinguaxe audiovisual, el valor de la imaxe y la importancia del soníu na ellaboración de la noticia, del reportaxe, la crónica, la información en directu, técniques d'entrevista, coloquiu y debate, presentación de les noticies y modalidaes de locución en radio y TV acordies colos estremaos xéneros periodísticos. Igualmente va dáse-yos a los profesionales de la RTPA una formación en pautes pal tratamientu informativu de conteníos sensibles casu de la violencia o la información de xéneru.

Los primeros n'entamar los cursinos de formación van ser los redactores de la RTPA, y darréu van facelo los responsables de les corresponsalíes de RTPA, los productores y los realizadores, que tamién van recibir conocimientos sobre producción y realización d'informativos de TV y trensmisiones deportives. Dellos periodistes de la RTPA van completarán la parte teórica con una estancia d'una selmana en dellos departamentos informativos de TVE en Madrid, mientres que con vistes al Diariu Dixital tamién van recibir un monográficu sobre redacción multimedia al cargu d'Emili Prado, caderalgu de la Universidá Autónoma de Barcelona.


Una segunda fase de la formación más técnica los periodistes van conocer les ferramientes de software y hardware poles que va mandase la redacción de la RTPA pa la edición de les noticies, que va permitir que cada redactor ellabore'l mesmu conteníu pa los trés soportes colos que va trabayar l'Ente. Esta va ser la fase más llarga del procesu formativu.