IX denuncia l'urbanismu na costa asturiana

Jesús Iglesias, Coordinador Xeneral d'Izquierda Xunida d'Asturies, denunció la esistencia d'una trama de "presiones económiques y polítiques sobre la costa asturiana por parte de grupos inmobiliarios" al rau del despidu del so puestu de trabayu nuna asesoría rellacionada col sector de la construcción d'un conceyal d'IX-BA nel Conceyu de Gozón, que'l grupu políticu rellaciona directamente "cola so oposición a la especulación urbanística que sufre la costa asturiana" onde dixo qu'hai planes pa construyir "60.000 viviendes que van suponer un deterioru del mediu ambiente"

Sigún Iglesias el despidu del conceyal ye un exemplu "de les presiones a les que se ven sometios los representantes municipales pola so oposición a la especulación urbanística que sufre la costa asturiana" y declaro que se trata "d'una escalada de presiones polítiques que resulta inaceptable y inalmisible, que pretende llendar l'exerciciu d'un derechu fundamental como ye'l de participación na vida política y condicionar la representatividá de la voluntá los ciudadanos". IX diz que va pidir la intervención de la Federación Asturiana de Conceyos (FACC) pidiendo que refugue abiertamente práctiques d'esti tipu, neto que ta mirándose la posibilidá d'acudir a la vía Xurisdiccional solicitando la intervención de la fiscalía, amás de poner en marcha distintes iniciatives de compromisu de los cargos públicos d'IX n'Asturies no que cinca al compañeru despedíu.

La conceyala d'IX-BA en Gozón Gabriela Álvarez declaró nesti sentíu que dende la llegada a l'Alcaldía del Partíu Popular y l'Agrupación Independiente de Gozón hai "un modelu d'urbanismu a la carta emplegando la vía de los convenios urbanísticos que faen que los promotores lleguen a la casa conceyu colos proyectos embaxo'l brazu y consigan sacalos alantre con total facilidá". La conceyala declaró que "Esti tipu de práctiques dan llugar a un dineru fácil, pero mui peligrosu. Dende hai añu y mediu los conceyales d'IX nel Ayuntamientu Gozón sentímonos vraeramente atemorizaos pola oposición qu'amosamos delantre d'esti desarrollu urbanísticu ablucante. Les amenaces aportaron incluso a persones que collaboraben con nos na denuncia d'estos fechos, ensin qu'éstes tovieren venceyaes a IX".

Pa Jesús Iglesias la especulación urbanística que se vien dando na costa de Gozón ye representativa de lo que'l so partíu yá denunciare en delles ocasiones primero nel restu d'Asturies, y ello ye qu'al dicir d'Iglesias al rau del crecimientu de de l'Autovía del Cantábricu tan dándose fenómenos especulativos de capitales de fuera d'Asturies que nun son dineru llimpio". Iglesias alvirtió qu'esiste riesgu de que n'Asturies acaben produciéndose desembarcos de Capitales, que xurden d'actividaes de blanqueu de capital y qu'amás en munchos casos puen apaecer vinculados a práctiques mafioses".
El dirixente d'IX dixo que se trata d'un esmolecimientu compartíu dende otres instancies como'l Ministeriu de Mediu Ambiente que se ficiera manifiesta tres de l'anuncia de la Ministra Cristina Narbona, de la necesidá, por una parte de que'l propiu ministeriu intervenga adquiriendo determinaes parceles que merecen protección medioambiental na marina y instando a les Comunidaes Autónomes a que xueguen les sos competencies sobre'l control del desarrollu urbanísticu. Dende Asturies, IU pretende que'l Gobiernu tamién lo faiga, siguiendo esta llinia señalada pol Ministeriu de Mediu Ambiente.



Dende la FSA- PSOE les crítiques d'IX un sentaron gota bien, y representantes del sociu mayoritariu de gobiernu n'Asturies dixeron que "falar de capitales de duldosa legalidad ye faltá-yos al respetu de les instituciones" convidando a los representantes d'IX a "nun entamar la precampaña electoral tan ceo y con argumentos d'esta triba y d'esta gravedá".