Los responsables del Crossroad Festival entamen l’añu con trés ciclos de conciertos

Trés ciclos de conciertos centraos en xéneros musicales estremaos son la propuesta de la organización del Crossroad Festival pa entamar esti añu 2006. La Sala Albéniz de Xixón va ser l'escenariu onde se faigan les actuaciones, que van consistir nun ciclu dedicáu a les voces femenines del flamencu, un segundu col pop por denominador común y un terceru que baxo'l títulu de "White Boys Blues" prométese más venceyáu colo que ye la filosofía del festival que tolos años trai a Xixón lo meyor del blues, rock y country.

El salmantín asitiáu n'Asturies Kike "Louie", alma del Crossroad Festival y de bien de conciertos d'estremaos estilos que la so productora LTI lleva alantre, entama l'añu 2006 faciendo un apueste por trés palos musicales distintos. De mano, Clara Montes abre mañana na Sala Albéniz el ciclu "Ente muyeres" dedicáu al flamencu cantáu por muyeres. Esperanza Fernández (19 de xineru) y la Mayte Martín (26 de xineru) completen les feches d'esti ciclu.

"Pop la cara" va ser el segundu ciclu d'esta riestra que tien preparada Kike "Louie" y va entamar el 9 de febreru con "Humbert & Humbert", mientres que'l 16 van visitar Xixón una de les bandes de más sonadía de la escena independiente de los 80 como foi "Aviador Dro". "Tarik y la fábrica de colores" piesllen el ciclu'l día 24 de febreru.

"White Boys Blues", dedicáu al blues fecho n'España, va ser el tercer ciclu n'echar a andar. La banda "Los Reyes del KO" va estrenalu'l día 9 de marzu, y los otros dos conciertos del mesmu van dalos el vienres 17 de marzu Malcom Scarpa y Ñaco Goñy trio y el 23 de marzu la Tonky Blues Band. Pente medies, el 3 de marzu va celebrase'l conciertu "Guitars and revolution" coles bandes "Comando 9mm" y "Desakato".