El premiu "Andrés Solar" reconoz la trayectoria d'Asturies.com

La Xunta Pola Defensa de la Llingua Asturiana acaba de facer públicu los nomes de los galardonaos na edición de 2005 de los premios Andrés Solar, qu'entrega con periodicidá añal esta organización n'alcordanza del escritor xixonés Andrés Solar Santurio. La empresa ARAZ NET S.L. responsable de la creación del diariu electrónicu Asturies.com, recibió'l premiu positivu o "pegollu" a la persona o entidá que más fexere pol asturianu a lo llargo del 2005 y en reconocimientu a los sos 10 años de trayectoria, mientres que'l premiu negativu o "madreñazu" foi pa José Ramón Pérez Ornia, Director Xeneral del Ente Públicu de Comunicación del Principáu d'Asturies.

L'Acta d'estos premios que van entregase'l próximu vienres 27 de xineru a les 19:30 hores nel salón d'actos del Antiguu Institutu Xovellanos de Xixón reconoz "l'esfuerzu de la empresa ARAZ NET S.L. pola so xera en favor del usu y l'espardimientu de la llingua asturiana." Nel acta, el xuráu "quier espresar cola concesión del "Pegollu" d'esti añu, el so reconocimientu a los méritos axuntaos non sólo a lo llargo del añu pasáu sinon a lo llargo de los diez años de vida d'esta empresa moza y pionera nel usu del asturianu nel ámbitu de les nueves tecnoloxíes" llamando l'atención sobre la "importancia los servicios qu'ofrez esta empresa, non sólo a la comunidá de falantes del asturianu sinon acullá". Según el Xuráu de los premios, "Araz ye un referente incuestionable d'asturianía na rede internet, pa tolos asturianos y toles persones interesaes n'averase a la realidá asturiana dende cualesquier parte del mundu, dando más valor -si cabe-, al compromisu d'Araz cola llingua y la cultura asturianes". La testera del conxuntu de webs entamaes por Araz, y que se desendolca al traviés d'Asturiactiva S.L., Asturies.com, ye la principal beneficiaria d'esti premiu, reconociendo l'acta como Asturies.com espeya "les posibilidaes pal idioma, a poco que se trate con un mínimu de respetu y de xusticia, siendo Asturies.com a caltenese ente los medios de comunicación asturianos más lleíos de la rede, mesmo cuando tien de competir n'inferioridá de condiciones con otros medios de más pesu económicu y qu'arrequexen davezu la nuestra llingua".

Les demás webs y preseos que tien desenvuelto Araz na última década siempre col asturianu como llingua principal, ente ellos el buscador Úlos?, la tienda asturiana na rede Asturshop o'l proyectu Caveda y Nava, amás del Iguador de la Llingua Asturiana son tamién oxetu del reconocimientu d'esti premiu.

Na otra parte, el premiu negativu o "madreñazu" a la persona o entidá más dañibles pa cola llingua nel 2005 foi pa José Ramón Pérez Ornia, Director Xeneral del Ente Públicu de Comunicación del Principáu d'Asturies. L'acta diz que "La Xunta pola Defensa de la Llingua entiende que la situación de la llingua asturiana nel añu 2005 tuvo muches carencies, teniendo esti madreñazu abondos candidatos posibles, pero'l despreciu que ta sufriendo la llingua asturiana nel procesu de creación del Ente de Comunicación del Principáu foi especialmente sangrín" colo que se xustifica la concesión del premiu negativu a Ornia "como responsable últimu de que l'asturianu tea escluyíu d'esti organismu". L'acta sorraya que "la Xunta pola Defensa de la Llingua Asturiana defendió y defende que la televisión asturiana tien sentíu si l'asturianu ye la so llingua vehicular, como pasa n'otres comunidaes con llingua propia" ello mientres que se ve que "nun existe nengún tipu de planificación pa la presencia de la llingua y la so normalización, dexando asina en papel moyao los cacarexaos Pautu de Gobiernu y el Plan de Normalización".