La Col.lá Propinde enllenó’l Vital Aza

El teatru del conceyu de La Pola L.lena quedó pequeñu pa la presentación del segundu discu del grupu La Col.lá Propinde. Más de 400 persones asistieron el pasáu día 29 d'avientu a la puesta de llargo de "Güeria" del que se despacharon les primeres 100 copies n'acabando'l conciertu nel puestín que la casa de discos L'Aguañaz preparare a tal efectu. Ente les pieces que más llamaron l'atención del públicu tuvieron "Suena'l Camín" banda sonora del documental del mesmu títulu sobre la escena musical de L.lena, xunta otres pieces de "Güeria" como L.landel.lena o Alcordances y delles del anterior "L.L" como L´emigrante.

Nel conciertu de presentación del discu tuvieron bien de los músicos que participaron na so grabación, ente ellos el percusionista Sergio García, el guitarrista "Lafu", Ramón Blanco de Los Berrones, la cantante Esther Fonseca de Llangres y Delfu de La Tarrancha. L'axenda de presentación del discu nuevu de La Col.lá Propinde va siguir el día 5 de xineru, que van tocar nel chigre Ca Beleño d'Uviéu, el 26 nel Trisquel de Xixón, y el 27 na presentación del discu pa la FNAC en Centru Comercial "Parque Principado".