Carreño votó contra la incineradora de Cogersa

El Conceyu de Carreño marcóse a la escontra de la incineradora de basura que l'ente Cogersa tien preparao asitiar en Serín (Xixón). El de Mieres tien enriba de la mesa otra propuesta que quier tamién que'l conceyu afite una postura contraria a la incineración de residuos sólidos urbanos.

El plenu del Conceyu de Carreño remató l'añu 2005 votando una moción contra la creación de la incineradora de basura que pretende asitiar l'ente autonómicu de xestión de residuos Cogersa en Serín (Xixón). La propuesta del grupu independiente UICA tuvo'l votu a favor de los conceyales d'IX y d'Andecha Astur, mientres que los de PSOE, PP y URAS abstuviéronse na votación, na que s'aprobó la moción.

Mientres, en Mieres, otru de los conceyos que son clientes del Ente de Xestión de Residuos Cogersa, el grupu d'Izquierda Xunida na casa conceyu presentó la selmana pasada una moción a plenu na que reclama que Cogersa abandone'l proyectu de la incineradora de basures de Serín y que se-y prohiba a la empresa quemar los residuos urbanos que se xeneren y recueyan en conceyu de Mieres. El calter "altamente contaminante" de la quema d'estos materiales ye l'argumentu pol que se xustifiquen dambes mociones presentaes por grupos políticos distintos y que tamién coinciden cola presentación de mociones por parte de la Unión de Consumidores, que punxo escritos nesti sentíu nos conceyos de Mieres y de Llangréu.