Conciertu de Tuenda en Cangas del Narcea

La Xunta pola Defensa de la L.lingua Asturiana del Suroccidente organiza pa esti miércoles 4 de xineru a les 18.00 h en Xedré (Cangas del Narcea) un conciertu con entrada de baldre del grupu Tuenda, tríu musical, qu'apuesta por axuntar cantares tradicionales del occidente astur col soníu de la flauta y el bouzouki y que presenta los temes del so primer discu. La Xunta pola Defensa de la L.lingua del Suroccidente ya organizare los pasaos díes 27 y 28 d'avientu en Xedré un cursu d'asturianu occidental, impartíu pol académicu Roberto González-Quevedo y al qu'asistieron mediu centenar de persones. A lo llargo del cursu presentáronse dos llibros n'asturianu occidental del autor "Naciu I Riguilón".

Cangas del Narcea tien dende l'añu 2001 una sección local de la Xunta pola Defensa de la Llingua Asturiana (XDLLA), fundada en 1984. D'entós p'acá la Xunta del Suroccidente caltién una intensa actividá nel conceyu cola organización de cursos, conciertos y campañes de promoción del asturianu.