Xulio Vixil presenta'l diariu d'un inmoral

Mon Legué, miembru de la etnia bantú y comedor de caparines, visita'l mundu de los undanda, la raza inferior, dexando unos cuadernos de viaxe. Esta ye la propuesta narrativa de Xulio Vixil na so nueva novela "L'inmoral" acabante d'asoleyar pola casa Trabe. La presentación de la obra aclaria que "los cuadernos de Mon Legué nun tán completos, porque-yos falten fueyes o pallabres, pero conócense bien nellos los viaxes fabulosos, atalántense les rellaciones amoroses, y atalántase, sobre too, una manera d'establecer la vida al marxe de la civilización de los undanda y de la so moral, una manera más fonda, más a mano y más aceda de conocer el nuestru propiu mundu".

La presentación d'esta obra va tener llugar güei martes 27 d'avientu a les 8 la tarde, na Aula Abierta de la Llibrería Asturiana Trabe nel númberu 4 de la Cai Padre Buenaventura d'Uviéu. La presentación va facela l'escritor Ignaciu Llope, venceyáu cola cuestión de la moralidá que trata la obra pola so profesión de médicu psiquiatra y miembru del colectivu etnográficu Belenos.

Xulio Vixil Castañón (San Xulián de Bimenes, 1964) ye llicenciáu en Filoloxía Hispánica, espertu en Llingua Asturiana, profesor y autor d'estudios y llibros de creación, ente ello la novela El paraísu blancu, el llibru de relatos Silvia la negra o los llibros de poesía A la gueta l'alba y El suañu de los vivos.