95.000 euros pa escavar les antigües mines del Aramu

Un més dempués de recibir el preste del Conseyu de gobiernu d'Asturies la creación d'un conveniu cola Universidá d'Uviéu pa escavar les antigües mines de cobre del Aramu (Riosa), ayeri mesmo firmóse'l documentu tripartitu ente Conseyería, Conceyu de Riosa y Universidá d'Uviéu que va poner 95.000 euros repartíos en en trés añalidaes de 12.000 con cargu al 2005, 58.000 pal 2006 y 25.000 nel 2007 pa que les mines de Texeo, na fastera de la Sierra del Aramu que cae pa contra Riosa y que daten del añu 3.500 enantes de Cristo, se conviertan nel yacimientu mineru meyor escaváu y investigáu d'Europa.

Asitiaes nel sureste de la Cordal del Aramu a una altitú de cerca de 1300 metros sobre'l nivel del mar, les mines de Texeo tienen una esplotación na dómina contemporánea, na que les fasteres de la cordal del Aramu y del Monsacro dieron bien de cobaltu, cobre y carbón hasta mediaos del sieglu XX, pero muncho enantes de la revolución industrial, les vetes de mineral yá s'aprovechaben pola mano humana, como descubrieron nel añu 1888 los inxenierios belgues y holandeses que trabayaben pa Fábrica de Mieres encabezaos pol holandés Van Straalen, director de Fábrica de Mieres, y el belga Alfons Dory. Tres de filones que-y pudieren servir a la industria moderna, los inxenieros decimonónicos llevaron una sorpresa cola que nun contaben al alcontrar vetes de cobre que presentaben señes de que yá se trabayaben na Edá de Bronce. L'afayu de los inxenieros confirmóse cuando atoparon el pozu de la mina prehistórica, nel que s'alcontraron bien de restos humanos, dellos col preséu de trabayu garráu nes manes, señal de que morrieren n'accidente.

Yá nel sieglu XX, el profesor de la Universidá d'Uviéu Miguel Angel de Blas Cortina retomó la investigación con una intensa campaña d'escavación arqueolóxica, completando'l descubrimientu de bien de restos humanos y preseos de los llabores mineros y metalúrxicos y iguando la datación de les esplotaciones. Los llabores de datación asitiaron la esplotació de les mines del Aramu a mediaos del tercer mileniu enantes de la nuestra era, conseñándose la so importancia como unes de les más interesantes de tola minería prehistórica europea. Blas Cortina va ser tamién l'encargáu de llevar alantre estes nueves escavaciones nel llugar.