IX – BA pide “Discriminación positiva” p’Asturies nel repartu de fondos europeos

El presupuestu de la UE pa los próximos siete años pue llevar a una perda de fondos estructurales pa la comunidá autónoma d'Asturies de cerca de 700 millones d'euros, ello ye, la metada de los 1.400 millones que se recibieron ente lo años 2.000-2.006. Pa iguar esta situación na midida de lo posible, el portavoz del grupu parlamentariu d'IX-BA Aurelio Martín reclamó que se dea dende'l Gobiernu Central una política de "discriminación positiva" p'Asturies y Murcia, les dos comunidaes autónomes del Estáu que van vese afectaes dende'l 2007 pol efectu estadísticu deriváu de la entrada de socios nuevos a la UE con baxos indicadores económicos que van facer que'l PIB asturianu y murcianu queden penriba de los mínimos precisos pa que la UE considere un territoriu oxetivu preferente .

El portavoz de la coalición Izquierda Xunida (IX) calificó de "llamentable" el presupuestu comunitariu que s'aprobó para estos siete años y plantegó la necesidá de que'l Gobiernu asturianu negocie col Central la forma de menguar el dañu. Anque aclarió que ye difícil tasar la cantidá de fondos que van llegar dende la UE a Asturies, Martín dixo que ye posible apautar una "discriminación positiva" hacia Asturies y Murcia pa menguar l'efectu de la baxada y que pue llevase a cabu al traviés del repartu de fondos de cohexón, de fondos tecnolóxicos y d'una mayor cofinanciación del Estáu nos planes de Desarrollu Rural. Estes trés midíes recuéyense nuna propuesta non de Llei que la organización política presentó ayeri en Rexistru de la Xunta Xeneral del Principáu y na que pide que nel nuevu marcu presupuestariu de la UE l'estáu garantice que la distribución de los fondos europeos que se faiga nel periodu 2007-2014 l'Estáu compense a les rexones perxudicaes pol "efectu estadísticu". Anque IX presenta la iniciativa en solitario cuenta con que'l PSOE la sofite en cuantes qu'existe un oxetivu compartíu de menguar el dañu que supón la perda d'ayudes".

Aurelio Martín criticó lo que-y abulta una "actitú hipócrita" por parte del PP y de la Federación Asturiana d'Empresarios (FADE) y el "trunfalismu"que-y paez que se gastó dende la dirección del PSOE y la so contornada énte los presupuestos comunitarios, que p'Aurelio Martín nun son otro qu'una "puya de la miseria".

Otramiente, el parlamentariu d'IX llamentó que les propuestes de financiación de la UE imponen la lóxica más neolliberal, la de los que camienten qu'Europa ha ser una zona de llibre comerciu "en cuenta d'una Europa cohexonada social y territorialmente" una postura que pa Martín ye "totalitaria" y que lleva a que sían los socios más probes de la UE los que tengan qu'arrecostinar colos costes de l'ampliación.