Serios problemes de contaminación en Veriña

Una unidá móvil de midición del Serviciu de Xestión Ambiental de la conseyería de mediu ambiente tuvo a lo llargo del pasáu mes de marzu analizando la contaminación atmosférica pa la parte de Veriña, en Xixón. De los datos de les sos midiciones entesácase que los niveles de partícules sólides en suspensión nel aire tuvieron penriba de los máximos recomendaos pa la salú prácticamente los 31 díes del mes. Son datos oficiales que la organización Ecoloxistes n'acción califica mui negativamente. Según apunten dende esta organización, el valor tope de partícules en suspensión namás pue superase 35 vegaes en tol añu, siendo'l casu de Veriña que'l tope encamentáu de 50 ug/m3 perpasóse tolos díes, llegándose en delles ocasiones a concentraciones de 250 ug/m3, cinco vegaes penriba d'esi tope y con una media nel mes de 129 ug/m3, cuasimente'l triple d'esi valor tope.

La confluyencia nel mesmu espaciu d'un gran númberu d'industries contaminantes como Arcelor, les térmiques d'Aboño y la fábrica cementu de Tudela -Veguín son la causa principal de la mala calidá del aire que se da na contornada de Veriña, una situación, que presenta riesgos pa la salú a mediu plazu al esmucise estes partícules, dacuando de metales pesaos, pente'l sistema respiratoriu, causando problemes de toxicidá o derivaos del calter enritante d'estes materies, qu'al posase sobre les plantas frenen la fotosíntesis natural y que tamién provoquen perda de la visibilidá por causa de la dispersión de la lluz.