Valledor y el Partíu Asturianista ven responsabilidá asturiana nos enfotos espansionistes gallegos

La propuesta del Bloque Nacionalista Gallegu (BNG) pa que l'estatutu d'autonomía gallegu espeye'l posible pasu de conceyos de comunidaes autónomes vecines a la gallega sigue llevantando ronches nel mapa políticu asturianu. Mientres el presidente asturianu intenta quitá-y fierru al asuntu, el Conseyeru de Xusticiu Javier Valledor y el Partíu Asturianista, dende argumentaciones distintes, coinciden en responsabilizar la dexación de funciones de los executivos autonómicos nel occidente asturianu como parte del orixe de les reivindicaciones gallegues sobre'l Navia-Eo.

El Conseyeru de Xusticia y candidatu por IX-BA nes pasaes autonómiques Javier Valledor tien claro la propuesta del BNG quier sacar tayada del "argayu cultural y llingüísticu que vien sufriendo l'occidente asturianu dende va unos años p'acá" y del que responsabilizó a los gobiernos asturianos, qu'amosaron desidia a la hora de "facer polos valores culturales d'esta comarca asturiana, al revés de lo que pasaba, al empar, na comunidá vecina". Valledor pidió más autocrítica por parte del Gobiernu asturianu a la hora d'analizar lo que ta pasando nel occidente asturianu y que nun se-y quitare importancia al asuntu, proponiendo la oficialidá del asturianu y el reconocimientu de la fala como una solución al problema.

En téminos más duros a la hora d'esixir una ermpuesta más dura dende Asturies a la propuesta gallega pronuncióse'l Partíu Asturianista (PAS). La formación de Xuan Xosé Sánchez Vicente fala espresamente de "complicidá" por parte del PSOE asturianu nos "reiteraos ataques" de Galicia a Asturies. El PAS diz lliteralmente en comunicáu de prensa que'l PSOE asturianu, en cuenta de dar una rempuesta contundente, ta "riéndo-y les gracies a los sos socios de gobiernu como-y les rió a ERC". El PAS responsabiliza al Presidente asturianu por "negase a reconocer qu'esiste un conflictu y anteponer la so obediencia al PSOE y la so amistá d'es - comunista con Touriño a los sos deberes pa con Asturies". El PAS fai tamién estensiva la culpa a PP y IX pola so "complicidá y silenciu nel despreciu a Asturies y la so reducción a la nada nel conxuntu del Estáu".