L’Atenéu Obreru de Xixón entama una selmana d’actividaes

L'Atenéu Obreru de Xixón tien programes pa esta selmana una riestra d'actividaes culturales qu'incluyen la presentación d'un DVD sobre una actuación artística del poeta David González y el fotógrafu Pedro Timón, una conferencia de José Luis Campal sobre'l poeta arxentinu Raúl González Tuñón y la presentación del últimu llibru d'Helena Trejo, "Camín davezu".

Les actividaes pa esta selmana del Atenéu Obreru pa esta selmana entamen n'Avilés, onde esti martes 13 a les 8 de la tarde va presentase'l DVD "Hablan las paredes" que recueye l'actuación artística del poeta David González y el fotógrafu Pedro Timón na Cai de la Mercé de Xixón el pasáu mes de mayu dientro del programa cultural "La Noche de las Palabras".

Yá en Xixón, y nel local del Atenéu del númberu 7 de la Cai Cuadonga, el miércoles14 a les 8 de la tarde va tener llugar la conferencia "La poesía combativa de Raúl González Tuñón" a cargu del filólogu y estudiosu lliterariu José Luis Campal, que recupera la figura de Raúl González Tuñón (Bonos Aires, 1905-1974) autor d'obres como La rosa blindada o La muerte en Madrid, espublizaes en tiempu de la Guerra Civil española.

El programa d'actividaes ateneistes pa esta selmana remata'l xueves 15 tamién nel local del Atenéu y tamién a les 8 de la tarde cola presentación del llibru "Camín davezu" obra de la poetisa Helena Trejo qu'edita la casa VTP. El mesmu editor Milio Rodríguez Cueto va introducir a l'autora d'esta obra que se presena como "una propuesta de concienciación y de reflexón, pa la xente mozo y pa toles persones qu'estimen la integridá de la tierra penriba'l poder económicu y políticu, sobre la llaceriosa situación que vive, anguaño, el mundu rural, que pierde, pasín a pasu, la so identidá milenaria, n'Asturies como n'otres munches partes del planeta Tierra, secuestrada por intereses ambiciosos pa los que la cultura autóctona nun tien dengún valir".