La multinacional de la informática Microsoft, creadora de los sistemes operativos Windows, enxertó esta selmana nel so catálogu de soluciones encamentaes l'Iguador de la Llingua Asturiana, productu desarrolláu pola empresa asturiana ARAZ pa l'Academia de la Llingua Asturiana y que permite la corrección de los enquívocos más comunes na escritura n'asturianu.
L'iguador ye'l primer corrector ortográficu informáticu de la historia pa llingua asturiana y supunxo de la que se presentó en xineru del 2004 un preséu de normalización importante qu'ayudaba a correxir les faltes más comunes na escritura. La so base de datos enxerta les más de 50.000 entraes del diccionariu normativu de l'Alla y conxuga más de 6.000 verbos, iguando too ello una base de datos de más de 4 millones de palabres, ello arriendes d'atender a les normes d'apostrofación y acentuación y cerca de 300 normes ortográfiques más. De funcionamientu cenciellu, l'iguador tien como finxu principal el control d'enquívocos léxicos y ortográficos al escribir, y pue personalizase gracies a la presencia nelli d'un "diccionariu d'usuariu" nel que puen enxertase pallabres al tenor de les necesidaes de testos especiales.
Agora l'Iguador ta acabante de recibir el reconocimientu de la casa de Redmond, que lu enxerta nel so Catálogu de Soluciones pa Microsoft Officetres de llegase a un alcuerdu ente la mesma Microsoft, ARAZ y L'ALLA. Asina, na páxina dedicada al Iguador dientro de la web oficial de Microsoft los usuarios alcuentren un enllaz que manda pa contra la web de l'Academia de la Llingua Asturiana, onde pue descargase de baldre esta aplicación en constante desarrollu y actualizada pa los sistemes y aplicaciones Microsoft Word 97, 2000, 2002 y 2003 XP.