El censu quíta-y un diputáu al occidente asturianu

Los datos del censu de población d'Asturies actualizaos al primeru de xineru de 2005 que se dieron a conocer esti día espeyen una perda de población del occidente asturianu, que perdería un escañu nes elecciones autonómiques del 2007, pasando de 7 a 6. L'escañu occidental diría pa la circunscripción central, que gana población. L'oriente, con una pequeña xuba demográfica, caltendría los cinco escaños qu'escueye actualmente. Con ello, el consiguir ún escañu pela circunscripción central asturiana abarataríase en númberu de votos.

La circunscripción central pasó nel 2004 de los 869.912 habitantes a 874.046, mientres que la occidental baxó de 129.942 a 128.417. Con ello, la Llei electoral obliga a un repartu nuevu de los escaños en parlamentu autonómicu que cuerre ún escañu del occidnte pal centru. De confirmase la tendencia a la perda de población del occidente qu'espeya'l censu del 2005, la circunscripción baxaría de siete a seyes diputaos na xunta Xeneral del Principáu nes elecciones que tienen de celebrase nel 2007. Ello ye que nes primeres elecciones democrátiques del 1983 l'occidente escoyó 8 de los 45 escaños de la Xunta, baxando bien llueu a los siete que tien anguaño. Tradicionalmente, los escaños de les circunscripciones de les ales d'Asturies suelen repartise ente los dos partíos mayoritarios (PSOE y PP) anque dacuando hebo formaciones que francieron esa dinámica, casu de la URAS que, na so primer convocatoria electoral nel 1999 algamó ún escañu pola circunscripción occidental. En cualquier casu, el fechu de que la circunscripción central ganare ún escañu podría llevar, siempre dependiendo tamién de la tasa de participación, a un abaratamientu en númberu de votos del primer escañu, lo que supondría que formaciones como la coalición PAS-URAS tendríen más posibilidaes d'entrar na Xunta Xeneral d'equí a la vuelta de dos años. Proyectando los datos del 2003 sobre un hipotéticu modelu con ún escañu más pel centru, IX-BA tamién tendríen más fácil el volver a ser llave del gobiernu al menguar la distancia ente los dos grandes partíos, qu'empataríen a trés escaños nel occidente.

En cualquier casu, el futuru del mapa electoral asturianu depende d'otres cuestiones, ente elles que s'apaute un posible aumentu del númberu de diputaos a escoyer (anguaño son 49), dalgo a lo que taría dimpuesta la FSA-PSOE. Lo que yá s'acolumbra más difícil ye que se cumpla la etenra aspiración d'IX- Bloque por Asturies, que demanden la circunscripción única, un modelu electoral que pondría más cara la mayoría absoluta pa un mesmu partíu y que-y permitiría a la coalición d'izquierdes atropar el votu que tien peles ales y que col sistema actual nun llega a concretase en representación nenguna na cámara. De facese asina, y colos númberos de les elecciones del 2003, el PSOE perdería dos escaños (de 22 a 20) que se repartiríen ente IX-BA, que pasaría de 4 a 5 y el PP que pasaría de 19 a 20). De cualquier manera, lo que políticamente ye más difícil -la circunscripción única- ye llegalmente ye más fácil, siendo abondo pa ello una reforma de la Llei Electoral por mayoría absoluta de la Xunta Xeneral, mientres que la xuba del númberu de 49 escaños que tien anguaño la Xunta Xeneral precisaría d'una reforma nel testu del Estatutu d'Autonomía.