La Xunta pola Defensa de la Llingua lleva'l debate sobre la oficialidá a la Escuela de Seronda

El próximu domingu 4 d’avientu, dientro de les actividaes de la Escuela de Seronda que lleva alantre'l Conseyu de la Mocedá del Principáu d'Asturies, la organización Xunta pola Defensa de la Llingua Asturiana va facer una xornada de debate baxo'l títulu "La Oficialidá de la Llingua Asturiana. Una Reivindicación ente la Prósima Reforma Estatutaria” pa la que la Xunta tien yá zarráu el programa de meses reondes y participantes.

Ello va ser nel Antiguu Institutu Xovellanos y va facese nuna xornada doble con sesiones de mañana y de tarde, emprimando les actividaes a les 10 y media de la mañana cola mesa

“Sociedá civil y llingües minorizaes: esperiencies y estratexes de defensa y promoción”

na que van lleer les sos comunicaciones y ponencies Pere Bueno, de la Obra Cultural Balear, Hector Saez, de la Plataforma per la Llengua de Cataluña y ún representante de la organización Ligallo de Fablans del Aragones. La sesión de tarde

va desarrollase baxo l'epígrafe xenéricu "Marcu llegal y llingua asturiana énte la prósima reforma estatutaria: la oficialidá inaplazable" entamando a les 16:30 con una mesa reonda na que van intervenir los abogaos Amable Concha, Esteban Entrialgo y Ignacio Fernández y el Profesor de Derechu Alministrativu d la Universidá d’Uviéu José María Perez, cola tamién abogada Yolanda González como moderadora del debate.

A les 18:30 va entamar la conferencia de pieslle de la xornada, que baxo'l títulu "El Movimientu de Reivindicación Llingüística n’Asturies, iniciatives nos últimos 10 años" va facer resume de la última década

cola participación de Fernando Villacampa, de la Xunta pola Defensa de la Llingua Asturiana.