Europa va decidir sobre’l mercuriu

Les emisiones a l'atmósfera d'esti metal pesáu, que ye ún de los contaminantes más dañibles que se conocen, tan pendientes d'una resolución del Comité de Mediu Ambiente del Parlamentu Européu.

La eurocámara tien de decidir d'equí a la vuelta de poques feches sobre'l documentu d'Estratexa Comunitaria del Mercuriu, que se presentó en xineru del 2005. Grupos ecoloxistes, ente ellos los asturianos Ecoloxistes n'Acción, tan apertando al traviés de la Oficina europea de Mediu Ambiente pa que los europarlamentarios sofiten les midíes que se proponen nesi documentu y que pasen per apautar unos valores tope d'emisión de mercuriu poles principales instalaciones industriales productores d'esti metal pesáu, ente les que rescamplen les centrales térmiques a carbón.

Les cuentes de los ecoloxistes asturianos periten que los grupos térmicos d'Asturies emiten tolos años a l'atmósfera cerca de media tonelada d'esti metal, que se desplaza al traviés del aire a grandes distancies y que ta contaminando los alimentos hasta niveles de riesgu significativu pa la salú humana al dicir de los grupos conservacionistes, qu'afirmen que la Valoración d'Impactos de la Unión Europea demuestra qu'ente 3 y 15 millones d'europeos tienen niveles de mercurio que perpasen los topes qu'encamienta la OMS y qu'hai individuos que presenten tases diez veces penriba d'4esos topes. Un estudiu asemeyáu nos Estaos Uníos diz qu'ente 300.000 y 600.000 rapacinos nacen tolos años con daños serios nel sistema neurolóxicu por causa d'esposición al mercuriu .

La prohibición d'esportar y importar a mediu plazu mercuriu metálico y derivaos de mercuriu, el tratamientu y almacenamientu de los restos de mercuriu industrial y prohibir los vertíos y emisiones de mercuriu al agua son delles de les midíes que lo ecoloxistes ven imprescindibles, neto que desaniciar esti metal de determinaes sustancies en que ta presente, como ye'l casu de la masa de los empastes dentales.