Xunta Moza valora nun 80% el siguimientu de la fuelga en secundaria

La organización xuvenil qu'ayeri organizó una fuelga nos institutos de secundaria d'Asturies en defensa del derechu a la escolarización del asturianu, peritó nun 80% el siguimientu global del paru, anque tamién sorraya lo desigual del ésitu de la convocatoria por zones y conceyos. Uviéu foi'l llugar onde garró más puxu la convocatoria, con un siguimientu d'ente'l 90-100% nos IES Monte Naranco, Iría y Ventanielles de la capital. Na cuenca del Caudal, el siguimientu tamién foi mui altu, con IES como'l d'El Batán, Bernaldo de Quirós y Sánchez Lastra de Mieres, nos que'l siguimientu tamién anduvo ente'l 90% y el paru dafechu, casu que se dio tamién nos IES de Lluanco, onde los estudiantes cortaron el tráficu a la puerta del IES, Candás, Cabanaquinta (Ayer), Cangues d'Onís y La Pola L.lena. Sigún los datos de la organización convocante, hebo un siguimientu d'ente'l 50 y el 80% nos IES Dr. Fleming, y Trubia d'Uviéu, y nos IES Rio Nora, Escultor Juan Villanueva y Astures de Siero, lo mesmo que nos IES de Ciañu (Llangréu) y Llanera. L'exitu de la convocatoria baxó hasta porcentaxes alredor del 20% nos IES Aramo y Pando d Uviéu y los IES de L'Infiestu y Cangas del Narcea, mientres que de los IES de Xixón y Avilés la organización inda nun aportó datos.

Por rangos d'edaes el siguimientu de la fuelga foi claramente inferior nos cursos de 1u de la ESO, que correspuende a los rapacinos de menos edá, y en 2u de Bachilleratu por atopase esi cursu en feches d'evaluación na mayoría de los centros. Xunrta Moza tamién quier destacar qu'a lo llargo d'esta selmana observáronse actitúes mui belixerantes dende la Dirección de dalgunos centros que pudieron restá-y participación al paru, que la la Xunta Moza valora de cualquier manera como un "ésitu incontestable qu'esperamos que repercuta na Conseyería d'Educación con pasos a favor claros y inmediatos nel respetu a los derechos educativos y llingüísticos de la mocedá asturiano".

Como puntu fuerte del paru convocáu pa esta mañana, la estaya de mocedá de la Xunta Pola Defensa de la Llingua Asturiana organizaba tamién una concentración de protesta énte les oficines de la Conseyería d'Educación n'Uviéu, momentu que recueye la semeya qu'acompaña esta información. Más de 200 persones asistieron a la concentración, que se llevó alantre con total normalidá y que se convertió nuna manifestación espontanea que salió de la sede de la Conseyería d'Educación hasta llegar a la puerta de la Xunta Xeneral del Principáu.