Unes xornaes van traer a Xixón la realidá palestina

La ONG Asamblea de Cooperación pola Paz presentó ayeri en Xixón el programa d'actos que la organización va entamar dende esti xueves 24 de payares en Xixón y que col títulu de 'El suañu d'un pueblu sin tierra: Palestina" y al traviés de conferencies, conciertos y esposiciones busca allegá-yos a los asturianos la realidá que vive'l pueblu palestín al empar que recaudar fondos pa un proyectu sanitariu de la Media Luna Encarnada Palestina.

Les xornaes entamen el xueves 24 payares con una presentación nel chigre XIZ de la Cai San Bernardo na que va participar l'escriror Justo Braga (nun confundir col sindicalista) y un conciertu d´Amazing Grace na sala Damn onde al día dempués va poder sentise'l testimoniu de Najaty Jabary, mélicu palestín de la media luna encarnada nun actu que va completase cola proyección d'un documental sobre la intifada. La llibrería itaca de la Cai Marqués de Casa Valdés va acoyer dellos actos d'estes xornaes, como una sesión de cuentos pa nenos que va facese'l sabadu y una llectura de testos árabes por Mauricio Schwarz. Otra llibrería de la ciudá, Alborá, participa tamién de les xornaes con un recital poéticu d'escritores asturianos que va facese'l llunes a les siete y media la tarde. Una esposición d'artistes asturianos y los conciertos de Xabel Vegas (Café Damn sábadu 26 a les 10) y el grupu Deua Dubra (Café Trisquel martes 29 a les 21:30) van poner la parte más folixera y van valir tamién pa recaudar fondos pa la organización de la Media Luna Encarnada.